Ram leh hnam humhalh hi rui thle mai mai chunga tihhlawhtlin chi a nilo - I&PR Minister

I&PR Minister, Lalruatkima chuan ram leh hnam humhalh chu rui thle mai mai chunga tihhlawhtlin chi a nilo tih sawiin, thiamna leh finna nen rilru fim tak pu chunga tih a ngai a ni, a ti.
Tuichangral Zirlai Pawl (TCZP) in Inrinni kaltaa Freshers' Social leh Zirlai titha lawmpuina hun Central YMA Hall-a an buatsaih a hmanpuina ah he thu hi sawiin I&PR Minister chuan ram leh hnam humhalh chu thiamna leh finna nen rilru fim tak pu chunga tih a ngaih thu a sawi a. Mithiam hranghlui te'n mual an liam zel a, an hnungzuitu \halai te abikin All India Services leh Central Service-ah direct-a lut an tlem tial tial chuan \an lak nasat a \ul zia a tilang tih a sawi a. Zirlai chawimawina dawng ve phalo te pawh \an la zel tura fuihin, tuna an dinhmun ai chuan a tawpa an thlen chin chu a pawimawh zawk tih hre tur leh chumi tur chuan insiam\hatna tur hun tam tak a la awm thu a sawi bawk.
Khual Zahawm nia he hun hmanpuitu Serchhip DRDA Project Director, H. Dolianbuaia pawhin zirlaite chu ruihtheihthil leh zuk leh hmuak a fihlim turin a chah a. Tun a lawmpuina an pek te chu exam a pass \hat mai duh tawk lova, chhawr tlak a thiam tura fuihin; tuna zirlai \ha taka pass hi hlawhtlinna kawng khat a ni a. Hlawhtlinna dang leh chu eng hna pawh vuan a eizawnna hmuh a ni, tiin hlawhtlinna chang zel tura tumruh turin zirlai kalkhawmte a fuih a. Eng hna thawk pawh dik tak leh taima tak a thawk a, midang te entawntlak khawp a mi rinawm ni tura fuihin, chumi hmang a zahawmna hlawh chhuak turin a fuih bawk. He hunah hian TCZP President, R. Lalmawizuala pawhin thusawiin, TCZP chu zirlai pawl a nih angin zirna chu ngaih pawimawh ber a nih thu leh bial chhunga zirna in hma a sawn theih nan theihtawp an chhuah \hin thu a sawi a. Zirlai ti\ha lawmpuina hlan tur an pung zel chu lawmawm a tih thu a sawi bawk. 
Tuichangral Zirlai Pawl hi kum 2003 a din a ni a, Tuichang lui rala khaw 14 - Bawktlang, Biate, Chekawn, East Lungdar, Hmunzawl, Khawlailung, Leng, Lungchhuan, Lungkawlh, Mualcheng, North Vanlaiphai, Piler, Sailulak, Sialsir te a huam a. Inrinni-a zirlai ti\ha chawimawina an pek te hi an huamchhung khawchhuak HSLC, HSSLC, Bachelor Degree leh Master Degree exam result chhuak hnuhnung bera First Division leh Distinction a tling chin te an ni a, tunhnaia RUSA Asst Professor lak thar zinga an member pahnih te pawh chawimawina hi hlan an ni bawk.

Comments

Chhiar Hlawhte