PHE Department hotu ten Thenzawl tana Vanva Dam Pumping Scheme ruahman an tlawh

Nimin khan PHE Department hotuten Thenzawl mipuite tui thianghlim mamawh phuhrukna tura ruahman, Vanva Dam Pumping Scheme an tlawh.

Vanva Dam Pumping Scheme hi PHE Department E-in-C, Er. Lalmuanzova hovin PHE Department hotute chuan tlawhin he tuikhuah hi April ni 13, 2013 khan siam zawh niin, Dam sei zawng hi meter 35 leh tuikhuahna tlangpui sân zawng meter 5 niin, lui hnâr lama tuikhuahin a awh thui zawng hi KM 1.5 a tling a. Tuikhuah-ah hian tui litre maktaduai 60 a tling mek ni a chhût a ni a, heta \ang hian mipuite hnena semchhuah theih zât tur chu litre maktaduai 33 a tling a, tuikhuah tui hi filter hmanga tih thianghlim hnuah Thenzawl khaw tana sem theih tura pump chhuah turin ruahmanna a awm mek a ni.

PHE Department hotute chuan Vanva tuikhuah hi mipuite tana tui in tur lâkna hmun bakah mipuite hawi khawthawnna hmun atan duan an tum a, tuikhuah-ah hian Sangha chi chhuah leh lawngleng dah bakah a kam tawn tawnah mihring kal theihna atana siam tumin ruahmanna an nei bawk a ni. Hemi hnu hian Thenzawl-a tui dahkhawlna lian ber tur, Main Reservoir leh Control Room tura ruahmante enin, Thenzawl PHE Site Office an tlawh bakah Thenzawl tana tuilakna pui ber tura ruahman, Mat luia tui pump-na tura ruahmanna te a hmunah an tlawh bawk a ni.

Tunah hian Thenzawl mipuite tan hian leihipna hmangin Sailam ram hmun hnih (2) a\angin tui lak mek a ni a, tun dinhmunah mi pakhat tan ni khatah litre 35 chauh tui sem theih a ni a, Vanva tui hi pump a nih chuan Thenzawl mipuite hian mipakhat tan nitin tui litre 55 sem phak a ni dawn a ni. Hetihlai hian khawpui \hangchak tak Thenzawl tan nitin mi pakhatin tui litre 135 vel zel an dawn a ngaih avangin Vanva tuikhuah bakah hian Mat lui tui chu Thenzawl mipuite tan pump a la ngai dawn tho tih PHE Department hotute chuan an sawi bawk.

Nimin-a helai hmun tlawhtu Er. Lalmuanzova, E-in-C hi Aizawl a\angin Er. C.Lalremsiama, CE (Zone-I) leh Er. Lalrammawia, SE (Rural) te bakah Serchhip a\angin Er. F.Lalsanglura, Sr. EE leh Er. Samuel LR Ralte, SDO-ten an \awiawm a ni.