Lengpui-ah Airline pathum service belh dawn

Mizoram-a Thlawhna \umhmun awmchhun Lengpui Airport-ah October, 2019 a\angin tuna service mek, Air India bakah Airline dang pathum- Go Air, Indigo leh Alliance Air ten ten service belh an tum.

Mizoram sawrkar-a Principal Consultant, Aviation Department Wg. Cdr. J. Lalhmingliana chuan a chunga tarlan Airline pathum te hian Director General Civil Aviation (DGCA) a\angin phalna pawh an hmu tawh tih sawiin, “Go Air leh Indigo te hian Airbus 320 service tir an tum a, Alliance Air erawh chuan passenger 74 phur thei ATR service an tum a ni,” a ti a. Go AIR chuan September 23 a\angin Thlawhna Service \an tir an tum a, Thlawhna kalkawng (route) chungchangah chuan Go Air chuan Kolkata-ah hmunpui neiin Kolkata-Guwahati-Aizawl-Guwahati-Kolkata ah an service dawn tih sawiin, Alliance Air hian Kolkata-Aizawl an service dawn a, Indigo erawh chuan an sector tur an la sawichiang lo niin a sawi bawk.

Principal Consultant, Wg.Cdr. J.Lalhmingliana chuan Lengpui Airport chu thlawhna \um nan a \ha tawk tih sawiin, “Tunhnaia Airport Authority of India (AAI) in an tehna ah Lengpui Airport \umhmun khauh zawng ‘pavement classification number (PCN)’ an tehna ah 36 a ni a, hei hi thlawhna lian tan pawh a hlauhawm loh a. India ram airport \ha 100 zingah pawh a tel a ni,” a ti a. Lengpui \umhmun a \hat tawkloh chhuanlama Airline te an \um/service duh lo nia sawi chungchang chu sawifiahin, “Lengpui-ah hian Airbus 320 hi a rih dan ber (maximum load) ang chuan a tum thei lo ngei mai a. Mahse maximum permissible landing weight ang chuan \um a ngai lo a. Thlawhna ti rit tu, a Fuel hi Lengpui ah a thun theih a, chuvangin a khata an thun loh avangin an tan \um a hlauhawm loh a. Lengpui a kal an hreh avangin chhuanlam an siam mai mai \hin a ni,” a ti bawk.

Airlines dang pathum (3) service belh tir an nih chuan Terminal Building in a zo dawn em ni tia a zawhna chhangin Principal Consultant chuan Terminal Building chu chei danglam an tum thu a sawi a, “Tuna khualzin lo chhuahna bulah hian zin turte luhna siamin a sirah bungraw endikna (X-ray) kan dah ang a, \hutna pawh dahbelh kan tum bawk a. October thla hma chuan Air condition dah belh tur nen hna hi zawh hman kan beisei a ni,” a ti bawk.

February ni 10, 2019-a Jet Airways in an service an tihtawp hnuah Lengpui Airport-ah hian Air India chiah a service a, Kolkata a\anga lo chhuakin Imphal a tlawh nen kar khatah flight 10 a awm a ni. Hetihlai hian Mizoram state \henawm khawpui Imphal leh Agartala-ah chuan nitin flight 14 a awm thung a ni.