J&K-a thleng hi Mizoram-ah thleng ve thei - Lalduhoma

ZPM Legislature Party Leader, Lalduhoma chuan Jammu & Kashmir chungchanga Central sawrkar-in Article 370 a nuaibo ang hi kan chungah pawh thleng ve thei a ni, a ti.

Nimin a Aizawl Press Club-a ZPM Legislature Party-ten chanchinthar thehdarhtute an kawmna ah he thu hi sawiin Lalduhoma chuan, “BJP kaihhruai central sawrkar-in Jammu & Kashmir (J&K) chungchangah Article 370 a nuaibo ta a. A dawt chiah Article 371 chu Nagaland, Assam, Sikkim leh Mizoram kan ni a, dinhmun hlauhawmah kan ding ve mai ang em tih hi kan ngaihtuah a ni,” tiin, “Hei hi kan chungah pawh a thleng ve thei,” a ti bawk.

Lalduhoma chuan North East State-te tan a hlauhawm loh thu hi Union Home Minister, Amit Shah chuan a lo sawi tawh tih pawh sawiin, “An chet zia leh hmalak duhdan kan thlir hian, khulaia mi pakhat thusawi avanga kan hnam hi hima him lo tur a ni ngawt lo. India Constitution an pawngsual a, Pathian-in min din anga kan hnam hi a awm thei dawn lo a nih chuan party ang pawh ni lovin, hnam anga kan do tlan a ngai a ni,” a ti bawk.

Tunhnaia Mizoram Legislative Assembly Speaker-in ZPM MLA ten Political Party an zawm a nih chuan, Anti- Defection Law hmanga phuar theih an nih thu a sawi chungchangah ZPM Legislature Party Leader Lalduhoma chuan, “India Independent hnuah khan MLA leh MP te mahni thlangtu te pawl phatsan a, anmahni thlang tling tu ni ve hauh lo te pawl a luh ching/uire ching, mahni pawl phatsan ching, Minister leh nihna dinhmun tha an chan dawn phawt chuan mahni pawl phatsan ching an awm a. Kum 1985-ah Rajiv Gandhi-a Prime Minister a rawn nih khan he Dan hi siam a lo ni ta a. He 10th Schedule hi Anti Defection Act kan tih hi a lo ni ta a ni,” a ti.

He 10th Schedule Para 2(2) hian Independent Candidate te chungchang pawh sawi a nih thu sawiin, “Independent candidate party-in a set-up ni lo, candidate te kha MLA emaw MP emaw an lo nihin Political Party-ah an awm thei lovang tih a ni. Political Party an zawm chuan disqualify theih an ni. A chhan chu Independent candidate kha party thlan an ni lo a. Amah thlang tling tute ni lo, inthlan laia amah vote tute ni lo party a ava luh khan a mah thlang tu te a phatsan a, a uire a ni. Chuvangin he dan in a tum ber chu Uire tur danna a ni. Defector danna a ni,” a ti a. “Hmanni lawkah kan speaker zahawm takin Statement a siam a, keini ZPM MLA te hi party a awm kan nih chuan, ZPM-ah pawh nihna kan chelh chuan ban theih kan nih tur thu a sawi a ni. Kawng leh lamah chuan invauna te pawh a ang lek lek a ni. Kan Speaker in a sawi hi Independent hrim hrim chungchang a sawina a ni. Party anga ding a, Independent a ding hi he danah hian a lang ve lo. Political Party zawng zawng hi a tirah recognise party tumah an awm lo,” a ti bawk.