HC in Tlungvel VC \hiahna Order a hnawl - MPCC

Mizoram Pradesh Congress Committee (MPCC) chuan High Court-in Tlungvel VC \hiahna Order a hnawl nia sawiin, MNF party in thu diklo an puangzar niin an sawi.

Hemi chungchanga nimin a thuchhuah an siamah MPCC Media Department chuan Mizoram sawrkarin August 6, 2019-a Tlungvel VC a \hiahna Order a tihchhuah chu Gauhati High Court, Aizawl Bench chuan dan lo a thiltih a ni tih hriain August 21, 2019 khan a hnawl tih tarlangin, MNF kaihhruai Mizo-ram sawrkar in Tlungvel VC a \hiah dawnin danin a phut anga insawifiahna hun a pek miah loh avangin Section 25 (1) of The Lushai Hills District (Village Council) Act 1953 Act a bawhchhia a, High Court hian VC \hiahna Order hi dan lo a thil tih ni a puangin a hnawl (set aside) ta tih an tarlang.

Mizoram sawrkarin Tlungvel VC \hiahna Order a siam hnu, August 17, 2019-ah Circle Inspector (CI)-in Tlungvel VC Letter Head, Seal leh Account bu te a laksak nghal a. High Court-in Mizoram sawrkar Order a hnawl hnu Vawiin thleng hian Mizoram sawrkar hian Tlungvel VC thil pawimawh a laksakte hi a la pe kir leh lo thung tih an tarlang bawk.

MNF Party ten August 26, 2019-a thu-chhuah siama “High Court hian sawrkar order a \hiat ni lovin, Tlungvel VC-te hi \hiah an nih lohna chhan tur sawifiah turin hun a pe mai zawk a ni,” tia an tarlang chu High Court Order a lang miah lo a nih bakah insawifiah tura hriattirna tihchhuah chu High Court tih tur a ni lo tih an thuchhuah chuan a tarlang a. Hei hi Mizoram sawrkar tih tur zawk tih tarlangin, “Hetianga High Court thutlukna chungchanga MNF-in thu diklo puangzar a, mipui rilru hruai sual an tum hi MPCC chuan pawi a tiin a dem takzet,” an ti a. Sawrkar chu a rang thei ang bera High Court thutlukna zah a, Tlungvel VC-te thuneihna hi pe kir leh thuai turin an phut bawk.