Chief Minister in Union Minister te kawm

Chief Minister hian niminpiah khan Union Tribal Affairs Minister, Arjun Munda pawh kawmin Mizoram tana thil pawimawh hrang hrang te an sawidun.
He an inkawmna ah hian Chief Minister chuan Mizoram chu ruihhlo tamna ram, Golden Triangle tia sawi- Thailand, Myanmar leh Laos ram hnaiha awm a nih avangin ruihhlo hmansual leh ruihhlo tawlhruk venna kawngah nasa taka hmalak a \ul thu a sawi a. Ruihhlo ngaite leh ngawlvei te enkawlna hmun Rehabilitation Centre changtlung tak din tura hmalak mek a nih thu leh chumi atana \anpuina awm thei te ngaihtuahpui turin a ngen a. Centre of Excellence in Sports tam zawk din chungchang te, loneitute thlai tharchhuah hlawk zawka hralhna tur te, Mizoram University leh India ram khawpui lian zualte-a Tribal Hostel sak chungchang te bakah Mau leh Rua hman \angkai dan tur leh uar zawka chin dan turte a sawipui bawk a. Union Minister chuan hengte hi a lo enzui tur thu leh theihtawpa hma a lak zel tur thu a hrilh.
Chief Minister chuan Union Minister for Railways leh Commerce and Industry Minister ni bawk, Piyush Goyal pawh a Office-ah kawmin Sairang thlenga Rel kawng siam mek chungchang an sawidun a. He hna hi thawh zawh thuai a \ul thu leh harsatna awmte pawh a hnena hriattir thuai \hin turin Union Minister chuan a hrilh a. Zokhawthar-a Land Custom Station tihchangtlun chungchang te, dan phal loh bungrua tawlhruk chungchanga Myanmar sawrkar nena inbiak chungchang te, Kawrpui-chhuah leh Zorinpui-a Land Custom Station din chungchang te, Saisihchhuah, Hnahlan, Vaphai, Farkawn, Thingsai leh hmun \henkhata Border Trade point hnathawh chhunzawm dan tur leh Act East Policy chungchangte an sawidun bawk.
Niminpiah vek khan Chief Minister chuan Airport Authority of India (AAI) hotute an Office ah a kawm a. Mizoram-a thlawhna tam zawk service tir chungchang te, khualzin phur chi mai bakah bungraw phur chi thlawhna service tir chungchang te, Lengpui airport tihchangtlun te leh Helicopter tam zawk service tir chungchangte an sawiho bawk a. AAI thuneitute hian Chief Minister in an Office ngeia Mizoram mamawhte thlena a tlawh chu lawmawm an tih thu leh a theihna apiangah a thu thlente chu an lo bawhzui tur thu an hrilh a ni.

Comments

Popular posts from this blog

PAN CARD an tih teh fo hi - Laldinpuia