World No Tobacco Day-2019 pualin Serchhip-ah Vaihlo \hatloh zia inzirtirna neih a ni

Nimin khan khawvel pumah Vaihhlo leh a kaihhnawih \hatloh zia inzirtirna Ni, World No Tobacco Day hman a ni a, Serchhip-ah pawh he Ni pual hian hun hman niin kumin hian ‘Tobacco & Lung Health’ tih chu thupui ah hman a ni.
Nimin a World No Tobacco Day pual hian Serchhip-ah chuan chawhma lamah Little Flower Convent School naupang ten Serchhip P&E Veng-a Mini Park a\anga P&E Veng YMA thlengin Vaihlo leh a kaihhnawih \hatloh zia inzirtirna atan kawngzawh an nei a, he hunah hian Vaihlo \hatloh zia tarlanna thuziak hrang hrangte kengin aurualna an nei bawk a ni.
Hemi hnu hian P&E Veng YMA Hall-ah World No Tobacco Day puala inkhawm neih zui niin Serchhip DLAO, H. Lalhruaitluanga MCS chuan khuallian niin a hmanpui a, khuallian chuan zuk leh hmuam in hriatrengna lama harsatna a thlen dan te sawiin, Mizote zingah Central Service leh Competitive Exam lama rualawhna a nasat laiin zirlai ten zuk leh hmuam tih mai kan chin avangin hei hian kan hriatrengna a tihchhiat thu a sawi a, chuvangin zirlaite tan zuk leh hmuam chu tihchhin loh a pawimawh thu a sawi a. Mi ten zuk leh hmuam an lo ti \hin a nih pawhin Cancer leh natna dang dang thlentu a nih bawk avangin ti chhin lo tur leh midangte aia danglam ngam ni turin he huna kalkhawm zirlaite chu chahin, a hlawkna chu anmahni in an tel tur thu a sawi bawk.
Serchhip CMO, Dr. Laldawngliana Sailo kaihhruai he hunah hian K. Hmingthansangi, District Consultant, NTCP chuan vaihlo hman in mihring Chuap a tihchhiat dan a lem nen entirin zuk leh hmuam tih avanga harsatna tawk damleh, PC. Lalrintluangi chuan Tuibur in a taksa lama harsatna a thlen dan leh enkawl dam a nih dan te kalkhawmte hmaah a sawi a. Serchhip-a 1st Class Judicial Magistrate, JH. Lalparmawii MJS chuan District Legal Services Authority (DLSA) hnathawh dan hrang hrang bakah Dan in vaihlo leh a kaihhnawih a khuahkhirh dan te kalkhawmte chu a zirtir bawk.
Nimin a he hun hmanna ah hian he Ni puala thupui, ‘Tobacco & Lung Health’ tih thupui hmanga zirlai naupangte tana lemziak intihsiakna a ti\hate hnenah lawmman sem a ni a, he intihsiakna hi Category hnih ah \hen niin Category A (Class-III to V)-ah Vanlalchhanchhuahi, Goodwill English Academy chu pakhatna niin Vanlalhmangaihi, Presbyterian English School, Serchhip chu pahnihna a ni a, Rohlupuii, Presbyterian English School Serchhip chu pathumna a ni bawk. Category B (Class-VI to VIII)-ah Lawmsangzuala, Goodwill English Academy chu pakhatna niin Lalremruati Pachuau, Presbyterian English School Serchhip chu pahnihna a ni a, Samson C. Lalnunmawia, Goodwill English Academy chu pathumna a ni bawk.

Comments

Popular posts from this blog

PAN CARD an tih teh fo hi - Laldinpuia