Sangha Market a \ha sawt hle - Fisheries Minister

Fisheries Minister, K.Lalrinliana chuan Mizoram chhungah Sangha market a \ha sawt hle tih sawiin, ramdang a\anga Sangha kan lakluh nasat danah a hralhna tur a vang lo tih a lang chiang hle tih a sawi.

Mizoram Fisheries Technical Service Association (MFTSA) General Conference vawi 28-na nimin-a Fisheries Directorate Conference Hall, Mizoram New Capital Complex-a neih a hmanpuina ah he thu hi sawiin Fisheries Minister chuan Sangha leh lui lam sa te hi sa hrisel, Zunthlum leh BP sang vei te tan pawha ei ngam a nih avanga a Market hi a la \han dawn chauh avangin Sangha-a Mizoram a intodelh theih nana \an lak a \ul thu a sawi a. Sangha-a eizawngtute tana training buatsaih \hin ah Sangha khawi dan chauh ni lovin, luidunga Sangha leh nungcha dang humhalh dan te, vairam a\anga Sangha chi lak kher ngai lova Mizoram a\ang ngeia Sangha chi an neih ve theih dan tur zirtir tel turin kalkhawmte a chah a. Sangha chauh ni lo Chengkawl, Kaikuang, Chakai leh luia kan hmuh ei tur hrisel tak tak te humhalh chunga a man leh hralh dan zawn a, kan hlawkpui tlan dan tur ngaihtuah a \ul thu a sawi bawk.

MFTSA General Conference-ah hian thupui atan 'Sangha tam zawk thar chhuah' tih hman niin he huna tarlan a nih danin tuna Mizoram-a Sangha Dil  zawng zawng zau zawng chu 5468 Ha niin Dil a\anga kum kaltaa Sangha tharchhuah zat chu 7013 MT a ni a. Serlui Reservoir chhut telin Mizoram lui hrang hrang te hi 1100Ha anga chhut a ni a. Serlui Reservoir leh lui a\anga Sangha man hi 400MT vel a ni. Kum kalta chhunga Mizoram in Sangha a tharchhuah zawng zawng chu 7413MT anga chhut niin nikum a Mizoram in Sangha a tharchhuah a\anga mi pakhatin kum khat chhunga Sangha ei tur a neih zat chu 5.7kg a ni. Hetihlai hian mi pakhatin kum khat chhunga taksa mamawh tawk Sangha a mamawh zat chu 11 kg a ni a, Mizoram mipuiin kum khat chhunga Sangha eitur kan mamawh zat chu 14300MT a ni.