Result lawmna Deputy Speaker in hmanpui

Chhiahtlang HSS chuan nimin khan HSSLC Exam result chhuakta a an result \hat lawmna an nei a, he hun hi bialtu MLA leh Assembly Deputy Speaker, Er. Lalrinawma chuan a hmanpui a ni.

Chhiahtlang Higher Secondary School in HSSLC Exam-a an result an lawmna hun an buatsaih ah hian Assembly Deputy Speaker, Er. Lalrinawma chuan zirlai naupangte leh zirtirtute thawhrimna rah a tak hmuh tur awm \hin chu lawmawm a tih thu sawiin, Zirlai pass hrim hrim chu a lawmawm tih a sawi a. Zirlaite chu an tuma chiang tura chahin, taihmakna nen tihtakzeta hmalam pan zel turin a chah a. Zirna sang zawk zir tura hmundanga an kal hunah pawh mahni indahhniam bikna nei lovin, chapo si lova taima taka zir zel turin a chah a, mi taima tan tlukloh tur bik tumah an awm lo a ni, a ti. He School dinhmun pawh a hriatsak thu sawiin Deputy Speaker chuan, tun aia dinhmun \ha zawka an awm theihna tur ngaihtuahpui reng an nih thu a sawi bawk.

Chhiahtlang Higher Secondary School hi khawtlang \angrualin kum 2014-a an din a ni a, kum 2018-ah Lumpsum Aided dinhmuna hlankai niin a din kum a\ang hian HSSLC exam an hmachhawn nghal a, hemi kum hian naupang 1 in hlawhtlinna a chang zo ve ta lova. Hemi hnu kum 2019 thleng, \um 5 exam an hmachhawn tawh ah zirlai zawng zawng ten hlawhtlinna an la chang vek zel a. Kumin hian HSSLC exam hmachhawn zirlai 10 an nei a, Distinction ah 2, First Division-ah 4, Second Division-ah 3 leh Third Division-ah 1 an pass a, tunah subject 3 zir theih niin, zirtirtu 5 an awm mek a ni.

Nimin a result an lawmna hi School Managing Board Chairman leh VCP ni bawk, CR. Dothanga chuan kaihruaiin School Principal, Lalawmpuii Ralte chuan an School dinhmun a tarlang bawk.