Latest News

MDC Bye-election-ah MNF Candidate thlantlin an ni

Kar kalta Ningani-a Mizoram chhimlam District Council pahnih-a MDC bye-election neih ah MNF candidate te chu thlantlin ve ve an ni.
Ningani kalta a Lai Autonomous District Council (LADC) hnuaia 5-Lungtian MDC Constituency leh Chakma Autonomous District Council (CADC) hnuaia 9-Ugudasury South MDC Constituency-a bye-election neih zawh taka vote tlate chu Inrinni khan Lawngtlai BNRGSK Hall-ah tluang taka chhiar a ni a, Polling Station 4 awmna LADC hnuaia 5-Lungtian MDC Constituency-ah hian vote tla 1188 a\anga vote 593 hmutu MNF Candidate, Sanghuliana Mualchin chuan a khingpui vote 591 hmutu rorellai INC candidate, H. Lungrualkima chu vote 2-in a hneh a. He bial-ah hian NOTA-ah vote 4 a tla bawk.
Polling Station 2 awmna CADC hnuaia 9-Ugudasury 'S' MDC Constituency-ah vote tla 1469 a\anga vote 820 hmutu rorellai MNF candidate, Charan Singh Chakma chuan a khingpui vote 615 hmutu BJP candidate, Susen Chakma chu vote 205-in a hneh bawk a. He bial-ah hian NOTA-ah vote 34 a tla bawk. MDC bye-election-a thlantlinte hnenah hian Returning Officer, Dr. Andrew H. Vanlaldika MCS chuan thlantlin an nihna Certificate a hlan nghal a ni.
Heti hian LADC-a Elected MDC seat 25 awmah INC-in seat 16, MNF-in seat 8 leh Independent-in seat 1 an chang a. Independent MDC hian INC thlawpin, thlawptu 17 neiin INC in sawrkar an siam a. CADC-a Elected MDC seat 20 awmah MNF-in seat 8, INC-in seat 7 leh BJP-in seat 5 an chang a. INC MDC 3 leh BJP MDC 1 thlawpin MNF an sawrkar mek a ni.

Comments

Popular News (Last 30 Days)