Vawiin-a National Technology Day pualin Aizawl-ah Chief Secretary hovin hun hmang

Directorate of Science & Technology buatsaihin nimin khan Aizawl Vanapa Hall-ah National Technology Day hman a ni a, National Technology Day hi Vawiin May ni 11 ni mah se sawrkar chawlh a nih avangin nimin khan hman a ni ta zawk a ni.

National Technology Day puala inkhawm nimin a neih hi Chief Secretary, Lalnunmawia Chuaungo chuan khuallian nia hmanpuiin Science & Technology hnuaia hmalakna hrang hrangte chhuanawm a tih thu a sawi a, “Hmasawn nan sum leh pai a pawimawh rualin a resource tak tak zawk, mihringte kan pawimawh hle zawk a ni,” a ti a, kan pi leh pu ten Technology an lo hman \angkai \hin tawh thu pawh sawiin, “Mei chhem alh nan chhemthei hman nachang an lo hre daih tawh a, keini pawhin kan nitin nun a hna kan thawhna kawngah technology hi \angkai takin a hman theih a ni,” a ti a. He huna Science zirlai kalkhawmte chu Mizoram tana mi \angkai leh chhenfakawm tak nih tum \heuh turin a fuih a, an tui zawngte haichhuak thiam tur leh an kal duhna zawngte chu an chhungte nen pawh a sawiho \hin turin a chah bawk.

Nimin a National Technology Day puala inkhawm hi Planning Secretary, C. Vanlalram-sanga chuan kaihruaiin tunlai khawvel hmasawnna zawng zawng deuhthaw hi Technology Revolution-in a hrin chhuah a ni tih a sawi a, Technology chu a chhe zawng leh \ha zawnga hman theih tak anih avangin kan hman danah fimkhur a \ul thu pawh sawiin, Science & Technology hnuaiah Innovation Facility Centre (IFC) sak mek a nih thu pawh a tarlang bawk.

National Technology Day hi kum 1998-a India-in ama kutchhuak Technology khawvel hriata a phochhuah Ni hriatrengna atan hman \hin a ni a. India ram chu Nuclear siam thei ram a nih zia lantir nan Rajasthan a Pokran-ah kum 1998 May 11-ah khan Nuclear ralthuam chu hlawhtling takin a enchhin a, hemi rual hian ‘Trisul’ Missile hlawhtling takin a enchhin bakah Thlawhtheihna ‘Hansa-3’ an vuah chu he mi ni hian hlawhtling takin a thlawh tir bawk a. Kum 1999 a\ang khan kumtin ram hmasawnna atana technology pawimawhna inhrilhhriatna leh inzirtirna hun atan he Ni hi hman \hin a ni ta a. Mizoram-ah pawh kum engemawzat kalta a\ang khan National Technology Day hi hman alo ni ve ta a ni.