SWD Minister in Serchhip-a EMRS tlawhin Thenzawl-a Vety Farm a tlawh bawk

Social Welfare Department (SWD) Minister, Dr. K. Beichhua chuan nimin khan Serchhip Kawlri tlang-a Eklavya Model Residential School (EMRS) tlawhin he School dinhmun a en a. Hemi hmalam hian Thenzawl-a Vety Farm chu tlawhin an hmalakna hrang hrangte a enpui bawk.

Nimin a EMRS Serchhip tlawhtu SWD Minister, Dr. K. Beichhua chuan amah lo lawmtu zirlaite hnenah Tribal kan nihna chu kan vanneihpui thei a ni tih hre tura chahin, Tribal Affairs Ministry in duhsak taka a thlawna zirna changtlung tak min siam sak chu a lawmawm hle a ni, a ti a. Zirlaite chu taima taka lehkha zir a, mi puitling leh chhawr tlak ni ngei tura \an la turin a chah a. Mi taima tan chuan eng kawngah pawh hlawhtlinna a awm thei zel tih hre turin a fuih bawk. He hunah hian Social Welfare Department Joint Director, A. Vanlalzami chuan he School dinhmun tlangpui sawiin, kumthar a\angin CBSE syllabus an zir tawh dawn thu leh Ministry pawhin result \ha tak nei ngei tura a beisei thu a sawi a. School mamawha hman turin lirthei pek thuai an nih tur thu leh zirtirtute hlawh pawh ennawn anih tur thu a sawi bawk. 
Eklavya Model Residential School (EMRS), Serchhip-ah hian Elementary leh Secondary Section-ah Zirtirtu 9 awmin, Higher Secondary Section-ah hian Zirtirtu 9 an awm a. Zirlai mipa 64 leh hmeichhia 48, an vaiin 112 an awm mek a, Kum kalta ah khan HSLC exam 11 ah 10 in an passed a ni.
AH & Vety Department Minister ni bawk, Dr. K. Beichhua hian nimin chawhma lam khan Thenzawl-a Vety Farm chu tlawhin Mizoram ah Thenzawl-a Vety Department ram aia \ha ram kan nei chuang lo tih sawiin, hemi tihhmasawn tuma theihtawp chhuah tlan a \ul thu a sawi a. Sawrkar hmasa in NEDP sum hmanga hma a lo lak tawhna te pawh thil \ha anih chuan hma an la chhunzawm zel dawn tih a sawi bawk.
Minister hi an Department Director, Dr. Hmarkunga leh a thawhpui ten lo dawngsawngin Dr. Lalramhluna, General Manager, chuan Thenzawl Vety Farm chanchin tlangpui sawiin, helai hmun hi October 25, 1981 ah din \an a ni a, tunah ram 728 acres a zau an enkawl mek a. Thawktu mi 41 awmin Fodder Development Farm, Duck & Poultry and Dairy Farm, Amusement Park and Livestock Based Eco-Tourism leh Goat Breeding Farm te chu an hmalak mekna a nih thu a sawi a. NEDP sum an hmuh a\angin Sial vulhna tur an sak mek thu a sawi bawk. Hei bakah hian kumin April ni 11 a\ang khan Kel lian chi Rajasthan a\anga an chahluh chu an vulh \an a, tunah hian Kel puitling 83 leh a note 4 an neih mek thu a tarlang bawk.

Comments

Chhiar Hlawhte

Youth Icon Top-50 thlang

PAN CARD an tih teh fo hi - Laldinpuia