SP in chawimawina hlan

Kar kalta Ningani zan-a Serchhip Medical Quarters-a kangmei chhuak \helh tuma thawkchhuak zinga hliam tuar te chu nimin khan Serchhip SP, R. Sathiyasundaram chuan tlawhin chawimawina thuziak leh pawisafai a hlan.

Kar kalta Ningani zan-a Serchhip Medical Staff Quarters, PC. Lal-romawia te luahlai kang avanga vanduaina thlenga hliam tuar te hi Serchhip SP, Sathiyasundaram chuan an chenna In-ah tlawhin chawimawina thuziak leh pawisafai a hlan a. Serchhip District SP hian kangmei \helhna lama hliam tuar- V. Lalrintluanga Field Veng, Vanlalpeka, Serchhip Vengchung, Huntharmawia, Serchhip Veng-chung leh Lalchhuanawma Ralte, Zozam Veng te chu an chenna In ah tlawh in midangte tana an inpekna leh huaisenna te chu fak tlak a nih thu leh entawn tlak a tih thu sawiin, Serchhip Police Department aiawh in chawimawina thuziak leh Rs.1000/- a hlan a, tuna hliam avanga Aizawl lama enkawl mek Huntharmawia pawh dam taka a rawn haw ngei a beisei thu sawiin, a rawn haw hunah Police te pawhin lo dawnsawn ngei an tum tur thu a sawi bawk.

Hemi hnu hian SP hian kangmei tuartu, PC. Lalromawia te pawh tlawhin an tawrhna chu pawi a tih thu hrilhin an mamawh tur eirawng-bawlna hmanrua a hlan bawk. Nimin a heng kangmei tuar te a tlawhna ah hian SP hi SDPO, David Bynadaolai leh Serchhip Police Station OC, Lalramhluna ten an \awiawm a ni.