Serchhip khawpui chhunga Tui harsatna thleng chawlhkar khat chhungin sutkian hman beisei

Tunhnaia Serchhip khawpui chhung hmun \henkhata PHE Department in mipuite hnena Tui sem chungchanga harsatna an tawh chu chawlhkhar khat chhung chuan sutkian hman an beisei thu PHE Serchhip WATSAN Sub-Division-a SDO, K. Lalrintluanga chuan a sawi.

Nimin khan Serchhip-a thuthar thehdarhtu \henkhat te chuan PHE Serchhip WATSAN Sub-Division-a SDO hi kawmin tunhnaia Serchhip khawpui chhung hmun \henkhata PHE Department in Tui an sem mumal theihloh chungchang hi an sawipui a. He hunah hian PHE SDO chuan he harsatna thlengah hian harsatna lian bik sawi mai tur a awm loh thu sawiin, amaherawh chu March 19-a Tui lakna Pipeline a puah a\anga in\an a nih thu sawiin, tunah hian Serchhip khawpui chawmna atana Tui lakna thuam\hat hna an thawh mek bawk avangin he harsatna hi a thleng ta tih a sawi.

Er. K. Lalrintluanga chuan March 19, 2019-a Tui pipeline puak avang hian nikhat Tui an pump theihloh thu leh chumi hnuah ruahsur in hnawl leh chirh te Tuikum-a an tuikhuah ah a hnawh avanga tui pump-ah harsatna an tawh thu te, nikum lama an Tuikhuah bula kawrte tui an lak chu tunah hian tui a tlem avanga duhkhawp pump tur a awm loh thu te, April thla tir lama Electric Supply a harsatna avanga an mamawh khawp Power supply an hmuhloh thu leh Tuikum-a Tui pump-na atana hman Diesel engine chu a chhiat thu leh a Spare parts an la hmuhloh thu te a sawi a. Hei mai bakah hian kar hmasa Inrinni khan Serchhip khawpui chawmna atana Tui pump-na, IOC Veng-a Booster Pump chu a chhiat avanga a vaiin ni 5 vel tui an pump mumal theih leh tak loh avangin harsatna hi a zual zui ta tih a sawi a. Heng harsatna te hi chinfel tuma hma an lak thu leh tunah hian nikhat ah darkar 18-20 te tui pump niin chawlhkar khat te a liam leh a nih chuan tuna an Tui neih ang ang te semrualin dan pangngaia an sem anga sem leh theih a beisei thu a sawi bawk.

Hei bakah hian PHE SDO chuan Serchhip khawpui chhung chawmna atana Tui lakna, Greater Serchhip Water Supply Scheme (GSWSS)-a khawl hman te chu thlak vek tura hma an lak thu leh tunah hian hnathawh tur zaa 95 vel thawk zo tawhin harsatna dang a awm loh chuan thla khat chhung velin commission hman an beisei thu a sawi a. Tunah hian Gen Set thar chu bun fel tawhin commission tum mek a nih thu a sawi a. Tuikum lui a\anga Tui pump-na (Vertical Turbine) pawh thlak tur niin tunah hian a khawl rawn thleng tawhin inthlanpui avanga a thawktu turte an la rawn kal theihloh thu a sawi a. Serchhip IOC Veng-a Booster Pump-a Control Panel pawh thlak tum a nih thu te pawh a sawi bawk.