MPCC in MIMER hming put tir leh an phut thu an sawi

Mizoram Pradesh Congress Committee (MPCC) chuan 'Mizoram Institute of Medical Education &Research' (MIMER) hming 'Zoram Medical College' tih-a a thlak chu MIMER hmalam hun ngaihtuahna nei miah lo leh mipuite zahna neih miah lo a MNF Sawrkar hmalakna niin an sawi.

Hemi chungchangah hian Inrinni khan MPCC Media Department chuan Aizawl Press Club-ah chanchinbu mite a kawm a, he hunah hain MPCC hruaitute chuan 'Zoram Medical College' chu MNF President, Zoramthanga hming chawia phuah a nih avangin Medical Council of India in a hming atana a lo pawm tawh MIMER hming put tir leh turin an phut tlat tih an sawi a ni.

MPCC Media Department Chairman, Lallianchhunga chuan kum 2004 khan State Referral Hospital tura ruahman-ah MNF sawrkar chuan phuahchawp takin bul a \an nia sawiin, MNF sawrkarin Referral Hospital sakna tur sum cheng vbc. 35.39 a hman danah an lawmloh tak em avangin Central sawrkar chuan sum la hmuh tur cheng vbc. 5.5 chu a release duh ta lo tih a sawi a. Hetiang a nih avang hian MNF sawrkar chhung khan 5th IR Police Battallion dah nan te, mimal Ar vulh nan te leh Private English Medium School atan te heng building lian tak tak te hi an hmang ta mai mai a. Tihngaihna a hriat tak thlawt loh avangin MNF sawrkar hmasa khan Kohhran pakhat hnenah he damdawi In hi a zuar hial a ni niin a sawi bawk. 

Lalianchhunga chuan kum 2008-a Congress party in sawrkarna a lo siam leh khan helai hmun hi nasa taka tuaihnum \hat leh a nih hnuah February ni 19, 2014 khan Ministry of Health & Family Welfare a\angin College din phalna hmuh a ni a, June ni 9, 2014-ah Medical College Committee hmasa ber chuan Medical College mai ni lo, Research Institute thlenga tihlen leh tihchangtlun theih tura ngaihtuahna thui tak sengin a hming atan 'Mizoram Institute of Medical Education & Research (MIMER)' tih chu a lo pawm fel ta a ni tih a sawi a. Mizoramin Medical lam zirna In sang a neihchhun chu ngaihtuahna pakhatmah seng lo leh a hming thlak hian nghawng a neih phah theih tur zia MNF Sawrkar hian a ngaihtuah pha lo tih niin an sawi bawk.

MPCC Media Department te chuan, “MNF sawrkar Council of Ministers Meeting-in MIMER hming thlak a rel hian Mizoram Medical College tih nise tiin rawtna a awm a.  Amaherawh chu, ruahman lawkna leh ngaihtuah lawkna pawh awm lovin, Minister pakhatin a rilrua an party President, Pu Zoramthanga hming lo lang zulzuiin ‘Zoram Medical College’ tih a rawt a, chu chu pawm a ni ta zawk a nih hmel,” tiin ‘a hming lam a nawm zawk nan; tiin Media lamah a lang zui niin an sawi bawk.