Inthlan zawh hnua Election Official te chet danah MPCC leh ZPM ten an lungawiloh thu an sawi

MPCC & ZPM Publicity Committee chuan Lok Sabha inthlanpui neih zawh taka Election Official te chet danah MPCC leh ZPM te chu an lungawilo tih an sawi a. Lunglei District Polling Station hrang hranga serial number thlak thleng chungchangah Returning Officer chu a mawhphurtu a nih angin a chunga action la ngei turin CEO an phut bawk.

Hemi chungchanga Inrinni-a thuchhuah an siamah MPCC & ZPM Publicity Committee chuan MP Election kan neih zawh takah harsatna liantham awm lovin tluang te in kan inthlang emaw an tih laiin inthlan zawh hnua hleih nei takin Election Official-te an che zui nia sawiin, an ngaih a \halo hle tih an sawi a. Inthlanna kengkawhtu Election Official-te chu State sawrkarin a control ni a a lan avangin an laka rinna nghah har an ti ta hle tih tarlangin, inthlan ni, April 11, 2019-a Vanglaini chanchinbu chhuakah MNF party candidate, C. Lalrosanga symbol leh Lalthlamuani, Independent candidate symbol tihsual palh ve ve niin an tarlang a. “Vanglaini chanchinbu-in an tisual tih an hriat veleh an chanchinbu copy pawh a theih ang angin an hnuk kir leh nghal a, ngaihdam dilna a tuk thlengin an siam zui bawk,” an ti a. Hetiang a Vanglaini chanchinbu-in ngaihdam an dil mawlh mawlh chung hian MNF party chuan Chief Electoral Officer (CEO) hnenah complaint an thehlut ta a, Dt. 11.4.2019 khan Vanglaini enkawltute lakah hian Returning Officer (RO) chuan Aizawl Police Station-ah FIR hial a thehlut zui ta bawk tih an tarlang.
MPCC & ZPM Publicity Committee thuchhuah chuan hetiang a nih lai hian Lunglei District lama Polling Booth hrang hranga MP candidate-te hming list an tarlanah Serial No.4 a awm, Lal Hriatrenga Chhangte leh Serial No.5 a awm Lalnghinglova Hmar-te chu an Serial number thlak thleng a ni tih pawh tarlangin, hei hi thil pawi tak a nih theih avangin MPCC leh ZPM chuan April 11, 2019 khan CEO hnenah complaint pawh an thehluh nghal thu leh thil diklo chhuifiah tura FIR thehluh chu sawi loh, mawhphurtute laka action lak a awm thu tun thleng hian hriat a la ni lo tih an tarlang a. Vanglaini-in Election Symbol pahnih an tihsual chungchangah pakhat zawk, Lalthlamuani symbol chungchang chu Election Official-te hian engah mah ngai si lovin MNF symbol tihsual zawkah chauh FIR thehlut a action lak a nih thu leh CEO hnena MPCC leh ZPM te complaint siam erawhin ngaihpawimawh a hlawh lo hle thung niin an tarlang bawk.
MPCC & ZPM Publicity Committee thuchhuah chuan hetianga hleih nei taka Election Official-te chet dan hian MPCC leh ZPM a ti lungawi lo takzet tih tarlangin, Lunglei District Polling Station hrang hranga serial number thlak thleng chungchangah hian Returning Officer chu mawhphurtu a nih ang ngeia a rang thei ang bera a chunga action la ngei turin Mizoram CEO chu an phut bawk.

Comments

Popular posts from this blog

PAN CARD an tih teh fo hi - Laldinpuia