High Court in May 27, 2019 thleng Zu zawrh phalsak leh turin Mizoram sawrkar a hriattir

Mizoram Sawrkarin Zu khapna dan thar a pass hnuah Model Code of Conduct vanga he Dan thar hi hman \an theih a nih rih loh avangin, Bonded Warehouse neitute chuan May ni 27 thlenga an license tihnun sak leh tura High Court an ngenna hnuah Court chuan May ni 27, 2019 thleng Zu zawrhna dawr te hawn tir leh turin Mizoram Sawrkar a hriattir.

Mizoram sawrkar in Assembly House-ah Zu khapna Dan thar a pass hnuah leh MLPC Act hnuaia Zu dawr ten Zu zawrh phalna an neih chin a tawp tak avanga tun thla ni 1 a\anga Zu dawr te khara Zu hralhchhuah tihtawp a nih hnuah Mizoram-a MLPC Act hnuaia Bonded Warehouse neitu pathumte chuan Zu khawl khawmsa an la ngah avang leh Zu khapna dan thar chu hman \an theih a la nih loh bawk avangin an license chu inthlan vuakvet zawhfel hma, May ni 27 thleng renew sak leh an nih theihna turin Court hi hmala turin an ngen a, an ngenna hi Gauhati High Court Aizawl Bench-a Judge, Justice Michael Zothankhuma chuan Zirtawpni khan a ngaihtuah a. Bonded Ware House pathum, Raphael Bonded Warehouse, RTP Bonded Warehouse leh SS Enterprise te hian a hrang \heuhin Writ Petition hi an thehlut a, hengte hi Gauhati High Court Aizawl Bench Judge, Justice Michael Zothankhuma chuan a rualin a ngaihtuah a, a thutlukna hi Inrinni khan ti chhuakin Mizoram sawrkar chu Zu khapna dan thar hman theih a nih hma, May ni 27 thlenga an license renew sak tur leh a zuarchhuaktu Vendor te license pawh Hapta khat ral hmaa renew sak turin a hriattir a. Court thuchhuak tarlan danin tun dinhmunah Zu dawr neitute hian Zu kawl lai Rs. 14,59,11,074.12 man an nei a ni.

Tarlan tawh \hin angin nikum December ni 18-a Mizoram Sawrkar Councils of Minister \hukhawm chuan MLPC Act hmanga Zu zawrh chu tihtawp relin Sawrkar Department kaihhnawih Zu zawrh chu a ti tawp nghal a, December ni 21 a\anga kumin January ni 14 thleng Dry Day puan zui a ni a, hei hi sawrkar-in pawhsei a tum laiin Zu zuartuten Court-a an khin avangin Zu chu zawrh lailawk leh a ni a, Zu zawrh phalna license pek chhuahte a thih ni, March ni 31, 2019 a\ang khan Zu hi zawrh chhuah a ni ta rihlo a. Zu khapna dan thar, The Mizoram Liquor (Prohibition) Act 2019 chu Mizoram Assembly in pass tawh mah se, Lok Sabha inthlanpui vuakvet-a Model Code of Cunduct in a phuar avangin Election Commission chuan he dan thar hi inthlan zawhfel ni tur, May ni 27 thlen hma hmang \an rihlo turin March ni 28 khan Mizoram sawrkar a hriattir leh a, hetihlai hian Mizoram sawrkar chuan Zu zawrh phalna a pek, Bonded Warehouse neitute leh a zuar chhuaktu Vendor te hnena license a pek, March ni 31-a tawp tur chu renew a remtih loh avangin Mizorama Bonded Warehouse neitu pathumte chuan Gauhati High Court Aizawl Bench ah hian kalin Zu khawl khawmsa an neihte tih ral theihna hun siamsak turin an ngen a ni.