MP inthlana MNF Candidate tur - C. Lalrosanga

Zu zawrh duh leh duhlo kan inkhing dawn - Zoramthanga

MNF Party chuan Lok Sabha inthlanpui lo awm turah Director General, Doordarshan New Delhi a\anga pension ta, C. Lalrosanga chu an Candidate tur a nih thu an puang a. MNF President leh Chief Minister, Zoramthanga chuan he inthlan kan hmachhawn turah hian zu zawrh duh leh duhlo an inbei dawn niin a sawi.

MNF Party hian nimin khan Aizawl-a Mizo Hnam Run-ah Lok Sabha inthlanpui neih tur leh Aizawl West-I bial-a Assembly by-election lo awm tura an Candidate tur puanna an nei a, he hunah hian MNF President leh Chief Minister, Zoramthanga chuan an Candidate turte hi puangin Lok Sabha candidate atan C. Lalrosanga, Tuikual North leh Aizawl West I by-election candidate atan Zothantluanga (Valtea), Zotlang-te an ni.

MNF party Candidate tur a puan hnua thu a sawi ah MNF President, Zoramthanga chuan he inthlan kan hmachhawn mai turah hian Zu zawrh duh leh duhlo an inbei dawn tih sawiin, “ZPM hruaitu tam tak hi Zu zawrh duh, Zu zawrh sawimawia lehkhabu te hial siam an ni. Congress lah kan hria a, Zu zuartute an ni a, an Zu lo zawrh titawp turin Assembly-ah pawh khapna Dan pass turin kan inruahman mek lai a ni. Zoram mipuite hian Zu zawrh duhte nge kan duh zawk Zu zawrh duh lote, tih hi tehna tur a ni dawn a ni,” a ti.

MNF President chuan MNF Party chu eptu lamin BJP nen \angdunah an puh leh dawn tih pawh sawiin, “BJP-in candidate hran an nei dawn a, keini in kan nei bawk a, kan \angdun lo. 'NDA-a thawk ho' an tih chuan ZNP leh MPC pawh NDA member an ni. Kum 2014-a Prime Minister hnena kan lehkha thehluhah pawh Pu Duha leh Pu Hmangaiha hming sign a awm thlap a ni tih kan hriat kha,” a ti a. BJP thu thua awm tur an ni lo tih pawh sawiin, “Ram leh hnam humhim nan kum 20 India kan lo do tawh a, hnam himna kan ngaih pawimawh ber a ni,” a ti bawk.

MNF Party in Lok Sabha inthlanpui-a an Candidate tur C. Lalrosanga hi March 1, 1957 khan piangin Pachhunga University College-a BA (Hons) a zir laiin sawrkar hna ah a lut a, kum 1975-ah All India Radio-ah News Editor hna thawk \anin hemi hnu hian hna pawimawh hrang hrang a chelh zui a, kum 1982 khan UPSC kaltlangin Indian Information Service zawmin kum 1991-ah UPSC kaltlang vekin Indian Broadcasting Programme Service a zawm leh bawk a, kum 2015 a\ang khan a pension thlengin Director General, Doordarshan, New Delhi hna a chelh leh bawk a, Aizawl Tuikual North-ah an chhungkua in an khawsa mek a ni.

Nimin a Mizo Hnam Run-a inkhawm ah hian thu sawiin C. Lalrosanga chuan ram leh hnam tana zau zawka rawngbawl tura ruat a ni chu lawmawm a tih thu sawiin, “Parliament hi ka mikhualna a ni lem lo a, Doordarshan-a Director General ka nih laiin committee hrang hrangah telin ka kal ve fo \hin a. DDK chungchang Parliament House-a zawhna lokal ka endik \hin a. Tin, Parliamentary Committee ka lo hmachawn ve tawh \hinna a\angin MP-te pawimawhna ka lo hmu ve tawh \hin a ni,” a ti a. “Pathian leh mipui zarah MP lo ni ta ila Citizenship Amendment Bill dodal nghal chu ka hna hmasa tur a ni dawn a. Pathian in ramri min pek humhalh tur te, Kristian nekchepna reng reng do bur turtein ka rilru a inbuatsaih a ni,” a ti bawk.

Aizawl West-I biala MNF Official candidate tur, Zothantluanga (Valtea) hi Aizawl Zotlang-a khawsa a ni thung.