Mizoram CEO in Political Party te kawmin Model Code of Conduct bawhchhe lo turin a chah

Mizoram Chief Electoral Officer, Ashish Kundra, IAS chuan nimin khan a Pisa-ah Political Party hrang hrang aiawhte kawmin Mizoram-a Lok Sabha MP thlanna leh Aizawl West-I Assembly Constituency by-election neih tur chungchang a sawipui a. Model Code of Conduct hman chhungin Dan bawhchhe lo turin a chah bawk.

Nimin a Political Party te a kawmna hunah hian Mizoram CEO chuan Pathianni tlai dar 5:00-a Chief Election Commissioner in Lok Sabha MP inthlan hun tur a puan a\ang khan Model Code of Conduct hi hman \an nghal a ni tih sawiin, Mizoram-ah chuan Lok Sabha MP thlan leh Aizawl West-I (ST) A/C by-election te hi a ruala neih tur a nih avangin notification tihchhuah hun, nomination file hun leh inthlan ni te a rualin tih vek anih tur thu a sawi a, hemi ang hian March ni 18, 2019 (Thawh\anni) ah inthlan anih tur thu notification tihchhuah a ni ang a, notification chhuah anih veleh inthlan chuh tum ten Nomination an file thei nghal ang a, Nomination hi March ni 25, 2019 (Thawh\anni) thlengin file theih ani ang. March ni 26, 2019 (Thawhlehni) ah Nomination Paper te endik a ni ang a, candidate ten an duh chuan March ni 28, 2019 (Ningani) thleng an Nomination file tawh chu an hnukkir thei ang. April ni 11, 2019 (Ningani) ah inthlan a ni ang a, May ni 23, 2019 (Ningani) ah vote chhiar a ni ang.

Chief Electoral Officer chuan Model Code of Conduct chungchang sawifiahin party tin te chu bawhchhe lo tura fimkhur turin a chah a, Nomination file na tur Form-26 chu ECI in an siam danglam hret avangin uluk leh fimkhur taka fill-up a \ul thu sawiin, Form-26 hi Fill-up kimloh anih chuan nomination hi hnawl anih mai dawn avangin hemi atana kaihhruaina dan siam te uluk taka chhiar chiang hmasa turin a chah a. Polling Station awm zawng zawng zinga za a sawm (10%) chu Hmeichhe pual bik Polling Station atana ruahman anih tur thu sawiin, First Randomisation of EVM hi inthlanni hma ni 21 ah neih tur a nih thu a sawi a, EVM endikna ah political party te chu kal kim ngei ngei \hin se a duh thu a sawi bawk.

Lok Sabha MP Election leh Aizawl West-I AC by-election atan Returning Officer hran ruat an ni a, Lok Sabha MP Election Returning Officer atan Aizawl Bawrhsap, Vanlalngaihsaka, IAS ruat niin Aizawl West-I AC by-election Returning Officer erawh tihfel ala ni lo. Hei bakah hian inthlan campaign chhunga political advertisement chungchang te leh media kaihhnawih thil pawimawhte inhrilhfiah niin inthlan leh a kaihhnawih chungchang hrechiang duh tan CEO website, ceomizoram.nic.in siam a nih thu a sawi bawk.