Diklo taka thawktu lak tumna a awm niin sawi

Social Welfare Department, Poshan Abhiyan Project hnuai a Post ruak 22 hnawhkhah nana Written Test paltlang mi 54 an awm laiin Written Test paltlang lo mi 20 te chu sawrkarin lak a tum vangin dik taka tlingte Exam neih tawh a cancel-sak niin ZPM chuan thuchhuah siamin an sawi.

Inrinni-a thuchhuah an siamah ZPM chuan Social Welfare Department hnuaia Poshan Abhiyaan Project atana hna lak tura Written exam lo paltlang tawh mi 54-te Written Exam Result leh Computer Test Exam an lo neih tawh chu Written-a tling lo mi 20 hming a lan ve avangin exam beitute hian an sawisel a, hei vang hian Exam lo neih tawh zawng zawng chu cancel leh vekin, a thara Exam nei leh turin thuchhuah an siam niin ZPM chuan an sawi.

ZPM thuchhuah tarlan danin Poshan Abhiyaan Project hnuaiah hian hna chi hrang hrang- District Coordinator (Post 3), District Project Assistants (Post 3), Block Coordinator (Post 8), Block Project Assistants (Post 8) te awmin a vaiin post 22 a awm a. Heng hna diltute hian February ni 9 khan Exam neiin Written Exam result chu February ni 14 khan tihchhuah a ni a, Written-ah hian mi 54 an inziak tling a. Written exam-a tling mi 54-te hi NIELIT, Zuangtui-ah Computer Test nei tura hriattir niin Computer Test February ni 23-a neih ah Exam nei tura tih te hi mi 20 a pun belh niin an vaiin mi 74 an ni tih an sawi a. Heng mi 20, a tira tlinglo te hi Computer Test an neih bakah interview tura koh tel vek an ni a. Hetia an pun belh tak avang hian thil diklo a awm ngei ni a hriat a ni a, interview tura hun ruat ni February ni 25 pawh cancel a nih thu ZPM thuchhuah chuan an tarlang bawk.

ZPM chuan he hna lak tur chungchangah hian Zirtawpni-a Notification chhuah leh niin Zonet leh DDK Aizawl-a Scroll-ah Written Exam leh Computer Test zawng zawng nena heng hna hrang hrang hi a vaiin cancel a nih thu chhuah a ni tih tarlangin, Written-a tling ve lo mi 20-te avanga Written lo paltlang tawh mi 54 te Written Exam result thlenga cancel chu ZPM thuchhuah chuan mak an tih thu an sawi a. Heng mi 20 Computer Test tura an koh, Written exam-a tling si lo mi 20 te hming, Roll No. leh Test an neihna Room te pawh an tarlang bawk.

ZPM chuan hetiang taka duhsak zawngte diklo taka lak tumna avanga hun leh tha leh sum leh pai tam tak senga dik taka tling Exam beitu ten an tuar chu an dem thu ZPM General Hqrs. chuan an sawi a. A hma a tling mi 54 te a\ang ngei hian heng post 22 hi la ngei turin Mizoram sawrkar chu an phut thu an sawi a. An test paltlang cancel sak lo ni tawh zawng zawng pawh a ngai anga pawm thar leh tur leh March thla chhung ngeia he thil tenawm leh diklo tak chingfel tura an phut thu an thuchhuah ah chuan an tarlang bawk.