Tripura Camp 3 ami ten \anpuina dawng \halo

Tripura-a Bru Relief Camp lian ber, Naising-para bakah Asapara leh Hazacherra Camp-a awmte chuan January thla a\ang khan ration buhfai leh \anpuina sum an hmu mumal lo.
Mizoram Bru Displaced People Forum Vice President, Laldawngliana sawi danin Naisingpara, Asapara leh Hazacherra Camp-a awm te hian kumin January thla quota buhfai hmun thuma \hena hmun hnih vel chauh an la hmu a, a bak zawng chu buhfai leina tur sum sawrkar laipui a\anga an hmuh zui loh chhuanlamin heng Camp pathum enkawltu Kancharpur Sub-Divisional Magistrate chuan buhfai an pe thei rih lo niin a sawi a, tangkafaia \anpuina sum an dawn \hin, Cash Dole tia hriat, puitling tan ni khatah Rs. 5 leh naupang tan ni khatah Rs. 2.50-a an pek \hin chu nikum November thla a\ang khan pek chhunzawm an ni lova, hetihlai hian sawrkar laipui thupek kumin January ni 11-a Union Home Ministry-in a chhuahah chuan Tripura Bru Camp 6-a Mizoram mi awmte Mizorama hruaikir zawh hun atan kumin March ni 31 thleng hun pawhsei a ni a, hemi rual hian Camp-a awm te ration buhfai leh \anpuina sum dawn \hin chu pek chhunzawm tur tih a ni.
Hetihlai hian Panisagar Sub-Division hnuaia Relief Camp 3, Kaskau, Khakchangpara leh Hamsapara Camp-a awm te erawh chuan buhfai dawn kawngah harsatna lian tham an la tawk lo nia thudawn a ni a. Buhfai leh \anpuina sum an dawn \hin pek chhunzawm chungchanga Naisingpara, Asapara leh Hazacherra camp-a awmten harsatna an tawh chungchangah hian niminpiah khan MBDPF hruaitute kaihhruaiin Naisingpara-ah inkhawm neih a ni a, hetah hian an lungawilohna lantir dan tur chungchang an rel a, a \ul anih chuan National Highway dan pin thlengin hmalak an tum niin an hruaitute chuan an sawi bawk.

Comments

Popular posts from this blog

PAN CARD an tih teh fo hi - Laldinpuia