PRISM in Dan siam\hat \ul ti

PRISM Party chuan MLA-ten sawrkar hnathawkte ang thova pension kum an thlen hun chauha pension an lak tawhna tur Bill siamin nimin khan Assembly Speaker hnenah an thehlut.

Hemi chungchanga PRISM Party thuchhuah chuan Mizoram-a MLA-te hian ‘Mizoram Salaries, Allowances and Pension of Member of the Legislative Assembly Act, 1999' hmangin hlawh leh ham\hatna an la tih tarlangin, an ram sum dinhmun \halo leh sawrkar sum sen dan siam-\hat ngai nasa tak awm avangin a bul \an nana MLA-te hlawh leh ham\hatna siam\hat a \ul tihna mipuiah a lian hle tih an tarlang a. Sawrkar hnathawkte kum 60 an tlin hnua an hna a\anga chawlhtir an ni a, pension ham\hatna pek an nih laia he Dan hnuaia MLA-ten MLA an nih loh veleh a\anga pension an la nghal chu ngaih-mawh hlawh zual zinga pakhat a ni tih tarlangin, Sawrkar hnathawk chu an kum a tam avanga an hna a\anga chawlhtira pension pek an nih laiin MLA-te erawh chu mipuiin kan hnawl avanga chawl an ni tih an tarlang.

PRISM Party chuan tun dinhmunah MLA pension hi thla khatah Rs. 20,000/- niin vawikhat aia tam thlantlin an nih chuan thla khat ah Rs. 5,000/- zelin a pung a. Hei mai hi ni lovin an pension hi kumtin 5%-in a pung zel bawk tih an tarlang a. MLA an nih hma emaw, an nih hnuah emaw pawh hna dang an thawk a, chu hna an thawh a\ang chuan pension ham\hatna an la a nih pawhin MLA pension hi an la zel thei tih tarlangin, hei hi siam\hat \ul an tih avangin Bill hi an thehlut ta tih an tarlang bawk.