Press Tour a zin MJA Member ten zin report an pe

MJA General Hqrs. chuan tunhnaia Mizo-ram sawrkar in Press mite tana Press Study Tour a buatsaih report ngaihthlakna hun nimin khan an buatsaih a, he hun hi I&PR Minister, Lalruat-kima chuan a hmanpui a ni.

Aizawl Press Club-a he hun buatsaih ah hian January 29 leh February 9 inkar chhunga Nagaland, Kolkata, Sikkim leh Meghalaya-a Press Study Tour-a kal ten an zinna report pein Tour report petu hrang hrang te chuan an zin chu hlawkpui an intih thu leh Mizoram in zirtur tam tak a nei nia an hriat thu an sawi a, sawrkarin zinna hun buatsaih sak zel thei se an duh tih an sawi bawk.

Nimin a MJA Tour report inkhawm hmanpuitu I&PR Minister, Lalruatkima chuan State dang hmasawnna te zira purchaw tura kal MJA member ten hun hlawk tak an hmang thei chu lawmawm a tih thu sawiin, “Chanchinbumite ham\hatna hrang hrang ngaihtuahin sawrkar chuan ngaihtuahna a seng mek a, Press tour pawh a \ul anga nei zel turin sawrkar chuan ngaihtuahna a seng zel dawn a ni," a ti. State dang ten khual-zin mite an hipluh tam chungchang sawiin, "Mizote hi mikhual thleng tura kan lo inbuatsaih a hun tawh a, kan hmunhma mai bakah kan nula leh tlangval te pawh lo inbuatsaih a hun tawh tak zet a ni," a ti.

Hnam inpumkhatna chungchang sawiin Lalruatkima chuan, “Mizote rilru-ah hnamdang ngaihtheihlohna a awm \hin hi a \ha lo a, kan vela hnam tenau zawk te hi kan huikhawm a, Mizo-ah tel tura hma kan lak a pawimawh a. Tun ang zela kan kal chuan kan dah hrang tel telh dawn a, Mizo hi hnam ropui ah kan siam thei dawn lo a ni. Naga hoten hnam tenau zawk an huikhawm anga kan chet ve a hun tawh hle in ka hria,” a ti bawk. He hun hi MJA President, Zonunsanga Khiangte chuan a kaihruai a ni.