Citizenship (Amendment) Bill, 2016 a lapse tak avanga lawmthu sawi tawngtai rualna neih a ni

Mizo Zirlai Pawl (MZP) huaihawtin nimin khan Aizawl-a MZP Conference Hall-ah Citizenship (Amendment) Bill, 2016 a lapse tak avanga lawmthu sawi \awng\ai rualna neih a ni.
MZP General Hqrs. Vice President, B. Vanlaltana kaihhruai he hunah hian Lalnunmawia Pautu, General Secretary chuan CAB 16 chungchanga MZP hmalakna tarlangin Ricky Lalbiakmawia, Finance Secretary, NESO chuan MZP leh NESO \angkawpa hmalakna te a tarlang a. Hemi hnu hian MZP President, L. Ramdinliana Renthlei chuan thu sawiin 'The Citizenship (Amendment) Bill, 2016' hi a lo chhuah tirh a\angin nasa takin NGO Coordination Committee anga an dodal \hin thu leh nawrhna hrang hrang an huaihawt \hin thu sawiin, heti khawpa nawrhna hrang hrang huaihawta hma an lak lai pawh khan India Sawrkar chuan pass tumin hma a la ngar ngar tih a sawi a. “Kan theihna zawng zawngin hma kan la tawh a, ‘Hei bak hi chu a awm tawh lo a ni’ tiin mihring chakna hmang chuan kan beidawng tawh a ni. ‘Pathian i au mai ang u, Pathian-ah kan innghah mai a ngai ta e’ kan ti a. ‘Engkim chunga roreltu Pathian kan nei a lawm, heti khawp a Pathian kan au chunga he Bill hi pass luih a nih chuan Pathian pawh hian Mizo \halaite hi kan duh zawng tih a remti ah kan ngai anga, Mizo \halaite hian kan tih tur kan ti ve tawh ang’ kan ti a. Pathian a huhoin kan au ta a, Pathian chuan kan \awng\aina, a mite mangang au aw chu a lo ngaithla a, kan dil leh kan duh chu min tihhlawhtlin sak ta a, The Citizenship (Amendment) Bill, 2016 chu Rajya Sabha ah pharh a ni ta lo a ni,” a ti.
L. Ramdinliana Renthlei chuan The Citizenship (Amendment) Bill, 2016 dodalna kawngah hian a ti bik leh a thawhhlawk bik an awm chuang lo tih pawh sawiin, Mizoram chhunga NGO hrang hrang leh Political Party hrang hrang te chuan theihtawp an chhuah tlang vek a, an theihna a inanglo mai a ni tih sawiin, tumah in dem tur an awm loh thu a sawi a, “The Citizenship (Amendment) Bill, 2016 Rajya Sabha-a pharh a nih loh chhan chu kan zavaia kan thawhrah vek a ni a, kan zavaia Pathian kan biak ho rah a ni,” a ti bawk.
He hunah hian BJP Mizoram Pradesh President, Prof. Dr. JV. Hluna chuan he Bill pass lo tur hian Mizoram BJP chuan nasa taka hma an lak thu sawiin, MZP leh pawl dang te hmalakna avanga pass a ni ta lo chu lawmawm an tih thu a sawi a. “He Bill hi a lapse hlen tawh dawn a, Central sawrkar hian thar thawh tum angin sawi mahse Parliament-a hnawlhnu tawh thar thawh leh hi thil theih loh a nih bakah thleng ngai lo a nih vangin engti kawng mahin CAB hi pharh nawn a ni tawh dawn lo tih hi Mizoram BJP chuan kan hre chiang,” a ti bawk. He hunah hian MHIP leh MUP General Hqrs. aiawhte pawhin thu an sawi bawk.

Comments

Popular posts from this blog

PAN CARD an tih teh fo hi - Laldinpuia