Chakma Foreigner hnawh-chhuah runpui neih \ul ti

ZPM General Secretary, Lalmuanpuia Punte chuan Citizenship Amendment Bill 2016 chu tluantling taka pass a nih hma ngeia Chakma Foreigner-te hnawhchhuah runpui neih ngai a tih thu a sawi.

Nimin a ZPM in Aizawl-a an Office-a Chhung Inkhawm an neih ah ZPM General Secretary, Lalmuanpuia Punte hian thu sawiin Central-a BJP sawrkarin Citizenship Amendment Bill-2016 tihhlawhtlin ngei tuma a in hmakhua mek lai hian Mizorama lolut ru Chakma Foreigner buaipui tham khawpa awm te a rang thei ang bera hnawhchhuah chu MNF sawrkar in hna hmasa berah a nei ngei tur a ni tih a sawi a. Zirlai Pawl leh NGO-ten kan ram leh hnam hmakhua ngai a theihtawp chhuaha CAB duhlohna leh dodalna an lantir tawh laia Chief Minister, Zoramthanga’n CAB dodalna tak tak a la nei lo fo chu ram leh hnam hmakhua aiin Lalna leh Thuneihna chauh a engto zawkah a ngaih theih niin a sawi bawk.

Hei bakah hian Lalmuanpuia Punte chuan MNF sawrkarin Vawiin thlenga kan hnam leh sakhua tihboral duhtu BJP te ala inthlunzawmpui duh reng mai chu Zoram mipuite zahlohna leh palzutna ah ZPM chuan an ngai tih pawh sawiin, MNF sawrkar chu Mizo hnam a hmangaih takzet a nih chuan BJP nena an inzawmna NEDA a\anga a rang thei ang bera inhnukdawk turin an phut thu a sawi a. MP inthlanpui lo awm turah pawh CAB kaltlangpui tumtu BJP leh a sangawi zawnpui MNF party-te chu hnawla, kan ram leh hnam himna tura hma latu ZPM-te \hahnemngai taka \awiawm turin Zoram mipuite a sawm bawk.