Thingtlang khua te tih hmasawn tum a nih thu sawi

Law Minister, TJ. Lalnuntluanga chuan khawpui-a pemluh kher ngailo turin thingtlang khua te buatsaih an tum thu a sawi.

UGC-Women's Studies Centre, Mizoram University buatsaih ni 2 awh tur 'Training of Trainers on Urban Development' hawnna inkhawm nimin a Mizoram State Guest House, Conference Hall, Aizawl-a neih a hmanpuina ah he thu hi sawiin Law Minister chuan Urban Development chu tunlai khawvelah thil pawimawh leh buaipui hlawh tak a ni tih sawiin, “Kan khawtlang nun atan te, ei leh bara intodelhna atan te, sik leh sa atan te thil pawimawh tak a ni,” tiin kan Society pawh khawpui tihhmasawnna hian a thlak danglam nasa thei hle tih a sawi a. “Urban Development scheme hrang hrang avangin sawrkar pawhin Urban Area-ah hlawhtlinna tam tak a hmu \hin. Hetihlai hian mipui pawhin ngaihtuahna dik leh fel kan neih a, hmasawnna leh inthlak danglamna chungchangah ngaihtuahna fim tak kan neih thin a \ul a ni,” a ti.

Minister chuan khawpui boruak chhe zel chungchangah sawrkar chuan Urban Green Infrastructure buatsaihin chutah chuan Green Park & Green Space-te an siamtir ang tih a sawi a. Urban Area-a In leh lo neituten thing leh hnim tihpun chungchangah nasa taka hma la-in ke an pen dawn tih sawiin, “Thingtlang a\anga Aizawl khawpuia kan insuan lut ruih ruih \hin chungchangah sawrkar chuan ruahmanna fel tak siamin District leh Sub-Division-ah te facilities \ha tak a buatsaih ang. Eizawnna mumal tak chhawpchhuakin khawpuia pemluh kher ngai lo turin thingtlang khuate buatsaih kan tum dawn a ni,” a ti bawk.