Myanmar sipai leh Arakan Army te an inkap leh

Lawngtlai District chhimthlang lam, India leh Myanmar inrinna bul, Myanmar ramchhung a Myanmar sipai leh Arakan Army te inbeihna chuan ziaawm lam a pan chhoh hnuah tunhnai khan thawm hriat tur a awm thar leh.

Thudawnna pakhat chuan Zirtawpni khan Arakan Army te hian Arakan state Buthidawng district-a Myanmar Police Outpost 4 an bei a, Police 14 an thi a, 9-in hliam an tawrh bakah silai 40 leh a mu 10,000 chuang Arakan Army te hian an laksak niin an sawi.

Myanmar sipai leh Arakan Army te hi kum 2017 chho bawra inkahna a thlen chhoh zeuh zeuh vangin inhumhimna zawngin Myanmar lam ni, Rakhyne (Mizo ten Zakhai an tih) hnam engemaw zat chu India ramchhung Lawngtlai District-a Hmawngbuchhuah leh a chhehvelah an tlanlut a. Myanmar Army leh Arakan Army te inbeihna chu boruak a dai chho deuha a lan hnuah engemaw zat chu Myanmar rama an khaw lamah let leh awm bawk mah se, chhungkaw 70 chuang chu Hmawngbuchhuah chhehvelah hian an chambang niin, khawtlang hruaitute chuan an sawi a, hetianga boruak a muanawm chhoa a lan lai hian Krismas hma deuh khan ramri hrul, Myanmar ram chhung, Varang chhehvelah an inkap leh niin an sawi a. Krismas lai velin silai ri hriat tur a awm loh hnuah, Krismas leh kumthar inkarah nasa vak lova inkap thawm erawh hriat tur a awm leh a, tunhnai inkahna vang hian sahimna zawnga India lam a rawn tlanlut erawh sawi tham an awm hrih lo nia thudawn a ni.