Latest News

Kum 2018 chhungin Anti-Tobacco Squad Drive tum 68 neiin mi 100 chuang man an ni

Serchhip District Anti-Tobacco Squad chuan nikum (2018) chhung khan Squad Drive \um 68 zet neiin dan bawhchhia mi 100 chuang an man.
Serchhip District Anti-Tobacco Squad te hian vaihlo leh a kaihhnawih khuahkhirhna Dan, Cigarettes and Other Tobacco Products Act-2003 bawhchhia an awm leh awmloh enfiahin District chhung hmun hrang hrangah leh a bik takin puipunna hmunah Squad Drive neiin Dan bawhchhia dapchhuah hna an thawk \hin a. Nikum January a\anga December thla tawp thleng khan Serchhip District Anti-Tobacco Squad hian hetianga Dan bawhchhia dapchhuak tur hian Squad Drive \um 68 zet neiin heng an vahchhuahna ah hian Dan bawhchhia mi 107 an man a, heng an mi man zinga tam ber hi Dan in puipunna hmuna mei zuk a khap bawhchhiaa lo zu te an ni a, heng mite hi Dan in a phut anga pawisa chawitir \hin niin pawisa chawi tlingkhawm hi Rs. 6310 a tling a ni. Nikum chhung khan zuk leh hmuam \hatloh zia inzirtirna pawh hmun hrang hrangah neih niin zirna In ah \um 63 hun hman a ni a, heng bakah hian Kohhran |halai leh tlawmngai pawl dangte nen \um 9 hun hman a ni bawk.
Vaihlo leh a kaihhnawih ti \hin ten an sim theihna tura an pan theih tura siam, Tobacco Cessation Clinic pawh Serchhip-ah kalpui zui zel niin he Clinic hi nikum chhung zawng khan mi 347 in an pan thar bawk a, heng mite leh a hma lama lo pan tawh te nen he Centre kaltlang hian mi 3157 ten Councelling an dawng bawk a ni.
National Tobacco Control Programme chuan tun dinhmunah Mizoram pumah Vaihlo leh a kaihnawih bansan tum te enkawlna hmun, Tobacco Cessation Clinic hi hmun 10-ah a hawng tawh a, heng te hi District tina Sawrkar damdawi In te bakah State Referral Hospital, Falkawn leh Mizo-ram State Cancer Institute Zemabawk te a ni.

Comments

Popular News (Last 30 Days)