Serchhip-ah Media ten JJ Act leh POCSO Act zirhoin Naupangte venhim kawngah \anrual \ul an ti

Serchhip District chhunga thuthar thehdarhtute tana Naupangte humhalh leh venhimna leh hursualna laka naupangte venhimna Dan zirhona chu nimin khan District Child Protection Unit (DCPU) Serchhip buatsaihin neih a ni a. He hunah hian DCPU Serchhip hmalakna hrang hrang inhrilhfiahna neih a ni bawk.

Serchhip Auditorium Conference Hall-a he zirhona hun ah hian Lalsiampuii, District Child Protection Officer, Serchhip chuan hursualna lakna naupangte venhimna dan, Protection of Children from Sexual Offence Act (POCSO Act) 2012 chungchanga zirtirna pein tunhma lama naupang chunga hursualna thleng \hin tuartu hmeichhe naupang ni \hin kha tunah chuan mipa naupangte pawhin nasa taka an tawrh tawh thu sawiin, hei vang hian nu leh pa te pawhin kan fanu leh fapa te dinhmun kan hriatchian a \ul thu a sawi a. POCSO Act chu awlsam taka bawhchhiat mai theih a nih thu sawiin, naupang kumtlinglo te an taksa si kher lo pawhin he Dan hi bawhchhiat theih a nih thu leh he Dan hnuaia thiamloh chantir te chu a reilo berah kum 3 tal tan tir leh pawisa chawitir a hrem theih a nih thu leh Dan an bawhchhiat a zirin kum 7 aia rei zawk te pawh tan tir theih an nih thu te a sawi a. Heng bakah hian rualbanlo (disabled person) te chunga pawikhawih tu leh sawrkar hnathawk Dan bawhchhia te hremna na zawk an tawrh theih thu a sawi a. Criminal Law siamthar ah pawh pawngsual bik phei chu hremna na zawk pek theih a nih tawh thu pawh sawiin, hmeichhia pawngsualtu chu damchhung tang tura an chungthu rel theih a nih thu leh kum 12 hnuailam a huho a pawngsual-a puh thiamloh chantir te pawh thi tura an chungthu rel theih a nih tawh thu te pawh a sawi bawk.

He hunah hian R. Lalramsiami, Probation Officer chuan naupangte humhimna leh venhimna dan, Juvenile Justice (Care and Protection) Act 2015 chungchangah zirtirna pein naupangte chu Dan hnuaiah humhalh an nih thu leh pawi khawihna an inhnamhnawih a puh an nih pawhin a hran an chungthu ngaihtuahna siam a nih thu a sawi a. Naupangte enkawl leh ngaihsak ngai bik te tan Child Welfare Committee (CWC) din a nih thu leh Serchhip District-ah pawh he Committee hi dinin pawikhawihna ah an inhnamhnawih a puh an nih pawhin Juvenile Justice Board (JJB) hnuaiah an chungthu hi ngaihtuah tur a nih thu a sawi a. Naupang harsatna tawk leh pawikhawihtute chu an nihna tilang thei leh chhuichhuah mai theih an nihna tura an hming leh thildang puanzar chu Dan bawhchhiatna a nih thu sawiin, Lung In tan thlenga hremna pek theih an nih thu a sawi a. Naupang chunga hleilenna chi hrang hrang thlentu te, Kutdawh tura naupang tirh te, ruih-theih thil ti tura tih leh ruihhlo tawlhna a inhnam-hnawih tirtute pawh Dan hmanga hrem theih an nih thu sawiin, Police Station tinah Special Juvenile Police Unit (SJPU) awmin heng mite nen hian thawhhona \ha tak neia hma an lak \hin thu a sawi bawk.

He huna tarlan a nih danin Dan bawh-chhia naupangte chungchang ngaihtuahtu, Juvenile Justice Board (JJB) Serchhip chuan din a nih a\angin thubuai 160 ziaklut tawhin nikum (2018) chhung khan thubuai 23 an ziaklut a. Child Welfare Committee (CWC) pawhin an din tirh a\angin Case 375 ziaklut tawhin nikum chhung khan thubuai 44 an ziaklut bawk a ni.

Serchhip-a DCPU enkawlna hnuaiah hian Home pathum- Observation Home, Zoar Urban Deprived Children Home leh Unity Orphanage Home te awmin heng zinga Children Home pahnih, Zoar Urban Deprived Children Home leh Unity Orphanage Home-ah te hian naupang 66 dahluh ni tawhin 41 chhuah tir an ni tawh a. Observation Home-ah hian naupang 38 dahluh ni tawhin 35 chhuah tir an ni tawh a. Naupang 334 te hnenah Sponsorship pek \hin niin tunah hian mi 41 hnenah Rs. 2000/- zel pek an ni bawk.