Inbiakpawhna lama hma-lakna tur sawihona nei

Information Communication & Technology Minister, Robert Romawia Royte hovin nimin khan Mizoram-a inbiakpawhna a \hat theihna tura hmalak dan tur hrang hrang sawihona neih a ni.

He sawihona Secretariat Conference Hall, Aizawl-a neih ah hian ICT Department hotute, Director NE-LSA, Mizoram, Department of Telecom, Govt. of India, Telecom & Infrastructure Provider Association of India (TAIPA), AMC leh Mizoram chhunga Mobile Service Provider leh Infrastructure Provider te an tel a, he hunah hian ICT Minister, Robert Romawia Royte chuan mipuiten inbiakpawhna kawnga harsatna hrang hrang an neihte sutkian dan uluk takin ngaihtuah ho a ngai tih sawiin, tun aia hmasawnna kan neih ngei theih nan thawhhona a pawimawh thu a sawi a, hemi atana theihtawp chhuah turin he huna tel te chu a chah bawk.

He hunah hian Service Provider hrang hrang ten Mizoram chhunga hna an thawhdan leh an hmachhawpte tarlangin, District tina Optical Fiber Network thlundan tur te, Mobile Service chak zawk neih theih nana hmalakna te, Call Drops tam lutuk te, thingtlang khaw tam taka Mobile Phone hman theihloh te, Broadband Service awm \hatloh chhan te sawiho a ni a. Aizawl khawpui chhunga Mobile Signal \hat tawklohna chhan chu Mobile Tower dahbelhna tur hmun a awm loh \hin vang a ni tih tarlan niin he harsatna sutkian dan tur te, District hrang hrang a bik takin Siaha leh Lawngtlai district a internet tihchak te, thingtlang hmun kilkhawr tak taka khawl bun harsatna te sawiho a ni.

Tun dinhmunah Mizoram-a khaw 704 zingah khaw 314 chu inbiakpawhna (Mobile Service) \hatlohna a ni a, Airtel Service Provider chuan Mobile Service \hatlohna khaw 252 ah Mobile Tower 227 dah turin hma an lak mek a. National Highway-ah zin mite tana Signal \hat theihna turin Mobile Tower 19 dah tum a ni bawk.