Hmarchhak bial-a zirlai pawl te bultumin Citizenship Amendment Bill duhlohna lantir a ni

Nimin khan India hmarchhak State hrang hrangah Zirlai Pawl te chuan 'Citizenship Amendment Bill 2016' duhlohna lantirin hun an hmang a, hemi ang hian Aizawl-ah pawh MZP General Hqrs. bultumin Citizenship Amendment Bill duhlohna hun hi hman a ni.

Aizawl-a MZP Conference Hall-a 'Citizenship Amendment Bill' duhlohna lantirna hun hi an pawl Treasurer, Michael Lalramsanga chuan kaihruaiin he hunah hian MZP General Hqrs. President, L. Ramdinliana Renthlei chuan India ramin a buaipui ber pakhat chu 'The Citizenship (Amendment) Bill, 2016' a nih thu leh North East mite hian he Bill hi kan duh lo tlang hle tih a sawi a. Citizenship (Amendment) Bill, 2016 hian India khua leh tui zawng zawng a nghawng avangin ngun zawka kan ngaihtuah a\ul hle tih sawiin, “The Citizenship (Amendment) Bill 2016 hi pawm a nih chuan Afghanistan, Bangladesh leh Pakistan a\anga India-a lo lut heng; Hindu, Sikh, Buddhist, Jain, Persi emaw Christian emaw te chu kum 6 chhung India ah an lo awm tawh a nih chuan India khua leh tui nihna pek tur an ni. He Bill-in a tum ber chu Hindu, Sikh, Buddhist, Jain, Persi emaw Christian mi leh sa te Afghanistan, Bangladesh leh Pakistan chhuak te tan India khua leh tui a nih theih dawn a ni. Sakhaw behchhana Citizen nih theihna tur Bill a ni ber,” a ti a. “The Citizenship Amendment bill, 2016 hi Indian Parliament a pass a nih chuan keini Mizoram tan phei chuan a hlauhawm zual hle a, Bangladesh a\anga dan lova lo lut Chakma foreigner te hian awlsam takin India khua leh tui nihna an nei thei dawn a. Mizoram-ah pawh NGO Co-Ordination Committee kaihhruaina hnuaiah All Political party leh Joint NGO pawhin duhlohna lantir a ni tawh a, Memorandum inang tlang thehluh a ni tawh nghe nghe a ni. Mizoram phei hi chuan kan za vaia tangruala kan do a ngai dawn a ni,” a ti bawk.
MZP President chuan The Citizenship Amendment Bill, 2016 zirchiangtu tura din Joint Parliamentary Committee on Citizenship Amendment Bill, 2016 hotute nikum lama NGO anga Delhi-a an hmuh khan Mizoram min lo tlawh ve tura an sawm thu leh North East state hrang hrang an lo kal \uma Mizoram min lo tlawh ve lo chu an hrethiam lo hle tih a sawi a. “Mizoram tlawh lo a Citezenship Amendment bill, 2016 hi pass a nih chuan India Sawrkar hian Mizoram hi India ram bung pakhatah min pawm lo ah kan ngai dawn a ni. Chuvangin Mizo \halaite hian kan tih tur kan hriaa kan tih tur kan ti ve mai dawn a ni. Citizenship Amendment Bill, 2016 pass a nih loh nan hian theihtawp kan chhuah ho a ngai a, tumah inpuhtawn lo in kan zavaiin i \angrual zel ang u,” a ti bawk.
He hunah hian North East Students’ Or-ganisation (NESO) Finance Secretary, Ricky Lalbiakmawia pawhin thu sawiin Citizenship Amendment Bill 2016 chu NESO chuan a tir a\angin nasa takin a dodal tih a sawi a. “He Bill hian India danpui-a Right to equality a kalh mai bakah Sakhuana thlenga in duhsakna thil niin NESO chuan angai a. He Bill hi pass anih chuan dan lova lo pemlutte avangin North East State-te chu a tuar nasa ber tur kan ni tih hriain, NESO chuan central Sawrkarah Memorundum vawi hnih a thehlut tawh bawk a ni,” a ti a. Tun Thlasik Parliament \hutkhawmah he Bill hi pass tuma ruahmanna siam mek a nih thu pawh sawiin, hei hi kal tlangpui anih chuan NESO chuan tun aia nasain a dodal zel dawn tih a sawi a. He an hmalakna atan hian kumin November 20 khan Guwahati-ah NESO kaihhruainain ropui taka dodalna hi neih a ni tih pawh sawiin, tun \umah pawh hian North East State hrang hrangah Citizenship Amendment Bill 2016 duhlohna hi neih anih thu a sawi bawk.
Nimin a NESO huaihawta he hun hman hi hmarchhak State hrang hrangah pawh zirlai pawl ten urhsun takin an hmang bawk a ni.

Popular posts from this blog

PAN CARD an tih teh fo hi - Laldinpuia