Serchhip bial-a ZPM Candidate turin Bial tana hmalak a tumna hrang hrang a puang

Zoram Peoples’ Movement (ZPM) chuan Inrinni khan Serchhip Bazar-ah Mual Inkhawm buatsaihin he hunah hian Serchhip bial-a an Candidate, Lalduhoma chuan thu sawiin Assembly inthlanpui a ZPM-a sawrkar hnua Serchhip khawpui tana hmalak an tumna hrang hrang a puangzar.

Mizoram Peoples Forum (MPF) Serchhip kaihhruaina hnuaia Inrinni-a ZPM Mual Inkhawm ah hian Serchhip bial-a ZPM Candidate leh ZPM Chief Ministerial Candidate ni bawk, Lalduhoma chuan Serchhip bial, Ramlai malsawmna haichhuak a, a khaw mipuite nen chu malsawmna chu changtlang ve turin, Pathian thiltihtheihna hmachhuanin he Bial-ah hian rawn ding a nih thu a sawi a. Serchhip boruak awmzia sawiin, “Tunlai hian Zoram pumah 'Congress der' leh 'ZPM lo der' an tam hle a ni,” tiin, “He Serchhip khawpuiah pawh hian chutiang mi chu an tam hlein ka hria,” a ti a. Mizoram pum dinhmun thlirin ZPM chuan nasa taka hma a sawn thu a sawi bawk.
ZPM in sawrkar an siam huna hmalak an tum dan hrang hrangte sawiin Lalduhoma chuan, Party sawrkar paihin mipui sawrkar din a nih tur thu a sawi a, ZPM a sawrkar a nih chuan sawrkar hnathawkte kut phuar chu phelhin khaw tinah Development Council din a nih tur thu a sawi a. Mi \henkhat ten Congress a sawrkar loh chuan NLUP sem chhunzawm theihloha an sawi chu, he sum hi sawrkar kum kalmek-ah Budget-ah dah a nih tawh avangin sawrkar thar ah nakum March thla tawp hmaa sem a nih tur thu a sawi bawk.
Serchhip bial-a ZPM Candidate ni bawk Lalduhoma chuan Serchhip khawpui chhung tana hmalak a tumna hrang hrangte sawiin, khawpui chhunga National Highway kaltlang bakah khawchhung inkalpawhna kawngpui \ha a awm theih nan hmalak a tum thu te, Serchhip khawpui zauh a nih theih nana hmalak tum a nih thu te, Serchhip Hmar Veng-a Sports Complex siam hna kalpui mek ti puitlingin a panna kawng pawh siam a nih tur thu a sawi a. Leisekawt Field chu tizauin Multipurpose Field atan hman a nih tur thu a sawi bawk.
Lalduhoma chuan Bazar building chu sa \hain Serchhip Venglai-a PWD ram rinlutin lirthei dahna awm thei tura siam a nih tur thu te, YMA te hma lo la tawhna ti pui tlingin Thlanmual in\awm siam a nih tur thu te, District Hospital sakna tura lung phum tawh ti puitling tura hmalak a nih tur thu leh kum khat chuang Ambulance hman theihloha awm tawh chu a thara thlak a nih tur thu te a sawi.
Kuthnathawktute tana hmalak a tumna zingah Mat lui-a Chawm kai Lei, tunhnaia a lung phum ve ngawt chu ngaih pawimawha sum ruahmana bawhzui a nih tur thu te, Mat lui chu Thenzawl kai chhakah khuapin Zawlpui phai-a thlai chinna atan hman a nih tur thu leh a theih anga Leilet laih belh a nih tur thu te, Lumtui lui chu khuah a nih tur thu te a sawi a. Thlai thar hralhna ngaihtuahin a vawn\hatna (Cold Storage) Sailiam-kawn-a awm chu tuaithara hman a nih tur thu a sawi a. Lal Thanhawla HSS chu dinhmun sang zawka dah a nih tur thu te, Dental College din a nih tur thu leh DIET Serchhip chu Degree Course zir theihna atan siam a nih tur thu sawiin, Serchhip District chu kum engemaw zat District ni tawh mah se a fu-ke ala kim loh avangin fu-ke kim tura hmalak a nih tur thu te a sawi bawk.
Serchhip Bazar-a ZPM in Mual Inkhawm an buatsaih ah hian ZPM General Hqrs. Vice Chairman, F. Rodingliana pawhin thu sawiin, Mizoram hmun hrang hrangah ZPM boruak chu a \ha chho zel tih a sawi a. “ZPM hian mithar kan lawmlut ve ngai lo, Pathian hnenah \awng\ai in lawmthu kan sawi mai \hin a ni,” a ti a. Mi \henkhat ten ‘ZPM chu an te’ an tih chu te tura duhtute \awngkam a nih thu leh sawrkar thar siam ngei an inrin thu a sawi bawk.

Popular posts from this blog

PAN CARD an tih teh fo hi - Laldinpuia