Polling Station venhim ngai zual 70 awm

November ni 28, 2018-a Mizoram Assembly inthlan lo awm turah Polling Station 1,164 awm zinga 70 chu venhimna uluk zual ngai ah ngaih a nih avangin Police silai kengte dah a ni dawn.

Kumin a Mizoram Assembly inthlanpui lo awm turah hian State pumah Polling Station 1,164 awm tura ruahman niin heng zinga 70 te chu venhimna ngai zual an ni a, heng zinga Polling Station 32 chu venhimna uluk zual tur, Critical Polling Station-a ngaih a ni a, Polling Station 38 chu harsatna thlen theihna hmun (Vulnerable location) a ngaih a ni bawk. Joint Chief Electoral Officer (CEO), Zorammuana chuan heng venhimna uluk zual ngai Polling Station-ah te hian Police silai keng dah an nih tur thu a sawi a. Mizoram Police silai kengte an indaih dawn loh avangin Central Armed Police Force (CAPF) Company 40 chahluh belh tura tih a ni, a ti a. Poling Station pangngai 1,132 ah te chuan venhimna hna thawk turin Police silai keng lo dah an nih thung tur thu a sawi. Jt. CEO, Zorammuana chuan inthlanna atana inbuatsaihna hi peihfel thawkhat a nih tawh thu a sawi a. Inthlan buaipuitu official-te tana training buatsaih chhoh mek a ni chungin inthlang thei tura ruahmanna hian a vawrtawp a thleng tawh tih pawh sawiin, Election Commission in CEO a rawn ruat thuai an beisei thu a sawi a. CEO atan hian Mizoram sawrkar chuan Lalhmingthanga, H. Lalengmawia leh K. Lalthawmmawia te chu a rawt tawh a ni.