Mizoram Larsap hovin Aizawl-ah Inter-Collegiate Youth Festival-2018 hman a ni

Central Agriculture University, Imphal hnuaia College 12 te intawhkhawmna, Inter-Collegiate Youth Festival, 2018 Vawi 5-na chu nimin khan College of Veterinary Science & Animal Husbandry (CVS&AH)-ah Mizoram Larsap, Kummanam Rajasekharan chuan a hawng.

Ni thum (3) chhung awh tur Inter-Collegiate Youth Festival, 2018 hawnna hunah hian Larsap chuan Central Agriculture University, Imphal (CAU) thuneitute ten hmarchhak state hrang hranga an zirlaite tana intawhkhawmna hun a siam chu inpumkhatna atana hmalakna \ha tak a ni tih a sawi a. Zirna bakah mipuitling leh khua leh tui \ha ni turin zirlaite chu chher an ngai tel bawk a ni, a ti. Larsap chuan India ram chu hnam hrangte chenhona hmun a nih angin hmasawna kawngah pawh inlungrualna nena pen ho dial dial a pawimawh thu pawh sawiin, India ram chu Agriculture a innghat a nih thu a sawi a, Agriculture University leh College te pawimawhna pawh mi zawng zawngin kan hrechiang em em a ni, tiin tuna zir mek te pawh mi tam tak zinga thlanchhuah an nih angin an zirlai lehkhathiam filawr tak tak a ni tih a chiang tawh tih a sawi a. India hmarchhak bial leh India ram pumpui tan CAU, Imphal hnuaia zirlai zawng zawng te chuan \an la sauh sauha, mithiam rawn tlak, Agriculture & Allied Sector atan mi \angkai tak leh thawhhlawk te an nih a ngai a ngaih thu a sawi bawk.
He hunah hian Central Agriculture University Imphal-a Vice Chancellor, Dr. M. Premjit Singh chuan hmarchhak bial chhunga Agriculture & Allied Sector a hmalak chhoh tum dan sawiin, India sawrkar hmathlirna zula hmalakna kal zelah India hmarchhak bial te chu 'Green Revolution Vawihnihna' thlenna hmun atan buatsaih mek a ni a. Organic Farming ngaih pawimawh bik niin Mizoram chhung bikah chuan kuthnathawktute ten ram zau tak an neih theih loh avangin sumchang thlai zingah pawh a man to deuh chi Sawhthing leh a dangte uar a pawimawh bik a ni, a ti bawk.
Tun dinhmunah CAU, Imphal hnuaiah hian State 7 - Arunachal Pradesh, Manipur, Meghalaya, Mizoram, Nagaland, Sikkim leh Tripura-ah te Constituent College 13 leh Krishi Vigyan Kendra (KVK) 6 a awm mek a. Mizoram-ah chuan CVs&AH, Selesih leh Horticulture College, Thenzawl te hi CAU, Imphal hnuaia Constituent College te an ni.
CAU, Imphal hi January 26, 1993 khan din a ni a, kumtin Graduate zirlai 572, Post Graduate zirlai 267 leh Phd zirlai 72 tan seat a awm \hin a ni. Tun \um CAU Inter-Collegiate Youth Festival-ah hian College 12 atangin zirlai 350 chuang zet an rawn tel a ni.

Popular posts from this blog

PAN CARD an tih teh fo hi - Laldinpuia