Mahatma Gandhi piancham vawi 150-na pual Seminar

Mizoram sawrkar-a General Administration Department (GAD) leh Governor's Secretariat \angkawp buatsaih Mahatma Gandhi piancham vawi 150-na lawmna pual Seminar chu nimin khan Raj Bhavan Durbar Hall-ah neih a ni a, he hun hi Larsap, Kummanam Rajasekharan chuan a hmanpui a ni.
"Gandhian Approach to Sustainable Development" tih thupui hmanga 'Hmasawnna Ngelnghet' chungchanga Pu Gandhi thlirna leh ngaihdan te zirhona hun buatsaih ah hian Larsap chuan tunlai khawvel hmasawnna \hang mek leh hauhsakna kawngah intlansiakna ah kan chhehvel boruak, tui leh leilung te nasa taka tihchhiat a ni mek a. India Hnampa, Mahatma Gandhi zirtirna leh hmasawn dan ngelnghet neih theih dan kawng lo sawi \hin chu zirchian leh zawm a ngai tawh tak zet a ni a ti.
Larsap chuan Gandhi-a zirtirna a\ang chuan ram leilung hauhsakna te chu mitin eikhawp pechhuak turin a tam tawk tih sawiin, mahse mitin duhamna tihhlawntlinna khawpa tam erawh a ni lo a ni tih a sawifiah a. Bungraw inchhekkhawl siaka hausa ber nih inchuha, environment ngaihthah chu hun lo la kal zel tura kan thlahte tan pawh thil chhiatna leh tam thlen thei a ni, a ti a. "Hmasawna ngelnghet kan tih in a kawh tak ber chu kan tu leh fate ten an khamkhawp an thawhchhuah theihna tura kan leilung te dimdawi taka enkawl chunga tuna kan mamawh tawk te nei thei tur a hmalak a ni ber a ni," tiin Hman tlem, hman leh theih tura siam danglam leh hmannawn inzirtir leh atak a kalpui chu hmalak dan tur dik a nih tur thu a sawi a. Hruaitu fing chuan leilung kalhmang a hmuchiangin hlauhawm leh harsatna lo thleng lawk tur te a man thiamin hun harsa hmachhawn thei tura lo inpuahchah lawk dan a hrethiam bawk tur a ni, a ti bawk.
‘Seminar on the Occasion of 150th Birth Anniversary of Mahatma Gandhi’ hawnna programme-ah hian Chief Secretary, Arvind Ray chuan he Seminar buatsaih a nih dan chungchang a sawi hmasa a. Hemi hnu hian Session Moderator, Ashish Kundra, Commissioner & Secretary, GAD chuan kaihruaina hnuaiah Seminar programme hman chhunzawm a ni. 
Kumin Seminar-ah hian 'Gandhian Approach to Sustainable Development' tih chu thupui atan hman a ni a. He thupui behchhan hian Prof. Laltluangliana Khiangte, HOD, Mizo Department, Mizoram University; Rev. LH. Rawsea, Associate Professor, Aizawl Theological College leh Dr. Saithanmawii, Assistant Professor, Department of Philosophy, Pachhunga University College te chuan an inpuahchahna te chhiarchhuah leh sawizauna hun an hmang a ni. Hun tawp lamah he seminar a zirtirna petu, mithiamte leh a chhimtute lam te chuan sawihona hun an hmang a. Seminar hi Secretary to Governor, K.Lalthawmmawia chuan lawmthu sawiin a khar a ni.

Popular posts from this blog

PAN CARD an tih teh fo hi - Laldinpuia