Kan boruak a \hat avangin dawtin min bei - Zoramthanga

MNF President, Zoramthanga chuan MNF chu an boruak a \hat avangin BJP nen thawkho tiin dawtin an bei niin a sawi.

Nimin a Aizawl Mizo Hnam Run-a Chhung Inkhawm ah MNF President, Zoramthanga hian thu sawiin MNF leh BJP an thawhho loh thu a sawi a. “BJP chuan Bial 40 awmah Aizawl S-II tih loh chu Candidate an nei vek a, keini pawhin Bial 40-ah Candidate kan dah kim vek. Hetah hian kan thawhho lohzia a lang chiang a, eng inthlanah mah BJP nen kan la \angdun ve lo. Pu Hawla'n BJP kan support-na kan withdraw a ti a, mahse CADC-a Congress leh BJP thawhhona kha Officially-in Governor-in a nemnghet a, a pangngaiin an sawrkarna a la kal reng. BJP nena thawkho zawk chu Congress an ni,” tiin inthlanpui lo awm turah Pathian zarah a malin sawrkarna an siam dawn thu leh BJP leh Party dang thawhpui an ngai dawn lo niin a sawi bawk.

MNF President chuan Pathian leh mipuite zarah an sawrkar a nih chuan Zu an khap bur dawn tih sawiin, Sikul kai hun kum 100 kan kalpui tawh chu a pangngai ang khan an kalpui leh dawn tih a sawi a. Zu leh Drug-a buaite enkawlna tur India rama Centre \ha ber pawl ni thei tur chu Pastor, Doctor, Sport leh Eduacation lam nen \angrualin an din tur thu te, Mipui Economy siam\hatna turin SEDP leh Programme lian dang nasa takin an kalpui tur thu te, Vehicle Tax kum 15 lak mek hi a petu te duh dana kalpuiin tihluihna an hmang ve loh tur thu te a sawi a, Sawr-kar hnathawkte hlawh leh ham\hatna hrang hrang pawh a \ha thei ang bera ngaihtuahsak an ni ang tih he hunah hian a sawi bawk.