Damdawi zuartute hriat tur pawimawh hrang hrang zirhona Serchhip-ah neih a ni

Health Department hnuaia Food & Drug Administration buatsaihin nimin khan Serchhip District chhunga Drug License neite tan an hnathawhna kawnga an hriat tur pawimawh hrang hrang zirhona neih a ni.
Serchhip Hmar Veng YMA Hall-a Food & Drug Administration buatsaiha he zirhona hun hi Serchhip Chief Medical Officer, Dr. Laldawngliana Sailo chuan kaihruaiin damdawi zawrh chu sumdawnna ni mah se khuahkhirhna hnuaia zawrh ngai a nih avangin fimkhur taka Dan hnuaia zawrh a \ul thu a sawi a. Tunlai khawvel-ah damdawi hmangsual te an tam tak hnuah phei chuan fimkhur lehzual a \ul thu a sawi bawk.
He hunah hian Sarah Laldintluangi, Asst. Director, Food & Drug Administration chuan Drug zuartute hriattur pawimawh hrang hrang a lem nen entirin damdawi te chu Very Special Commodities a nih thu leh uluk taka hman tur a nih avangin Dan hnuaiah chiah zawrh theih a nih thu a sawi a. |hatpui theih a nih rualin hmansual chuan thihna hial thlentu a nih theih avangin a duh duh in an zawrh ngawt chu a theih loh thu leh damdawi \ha tam tak a awm laiin a lem leh dan diklo a siam te pawh a awm thu sawiin, khawvel puma damdawi lem siamchhuah chu damdawi siamchhuah a\anga za zela 10 lai a nih thu te, khawvel ram hrang hrang zingah India chu hetiang tamna a nih thu leh India ah pawh hmarchhak chu a hluarna a nih thu a sawi a. Hei vang hian damdawi zuartute pawhin an damdawi zawrh tur an lakah an fimkhur  a\ul thu leh a man tlawm ringawt lak chu a him loh thu a sawi a. Serchhip-a damdawi zuar te damdawi zawrh chu lakhawma enfiah fo a nih thu leh a \halo leh himlo te chu mipuite hnena zawrhchhuah a nih lohna tura an tih \hin thu a sawi bawk.
Serchhip District-ah hian Drug License nei 166 awmin heng zinga a tam ber hi License tenau, Restricted License niin he License nei hi 148 zet an awm a, Pharmacy nei-a damdawi zawrh phalna (General License) nei 14 awmin Wholesale License nei pakhat (1) an awm bawk a, hei bakah hian Homoeopatic (Ayurvedic) damdawi zawrh phalna nei mi 3 an awm bawk. Serchhip District-a damdawi zawrh phalna nei zingah mi 8 te chu chhan hrang hrang avangin an License tihtawp a ni tawh a, License Renew loh, tih thih tur 27 a awm mek a, kum 2017-2018 chhung hian License 22 pekchhuah niin heng te zinga a tam ber hi thiangtlang khua, damdawi dawr awmlohna leh a awmsa ten mipui mamawh an phuhruk zawhloh avanga pek belh a ni tih a sawi bawk.

Popular posts from this blog

PAN CARD an tih teh fo hi - Laldinpuia