Serchhip in khawpui fai lawmman a lak lawmna leh Faina Hapta kharna hun hman a ni

Kumin a Faina Hapta hman kharna leh Mizoram khawpui Fai inelna neih zawh taka Serchhip khua in Mizoram District Hqrs. te zinga lawmman pahnihna a lak lawmna chu nimin khan Serchhip Auditorium-ah neih a ni a, he hun hi Serchhip SDO (Sadar) R. Vanrengpuia chuan khuallian niin a hmanpui a ni.

Serchhip-a Faina Hapta kharna leh Mizoram khaw fai lawmman pahnihna lawmna nimin a neih ah hian Serchhip SDO (Sadar), R. Vanrengpuia chuan Serchhip khua in nikum-a Mizoram khawpui fai inelna a 6-na dinhmun a luah laia kumin ah 2-na a ni ta chuan ‘Serchhip khua hi kan fai thei a ni’ tih tilangtu a nih thu a sawi a. Hemi atana hma latu sawrkar Department hrang hrang, tlawmngai pawl leh zirna In bakah mimal hrang hrangte chungah lawmthu a sawi a. He faina kawnga hmalakna ah hian mi inphalte avangin kan khawpui chhunga National Highway-54 kawngpui kamah Side Drain laih a nih thupawh sawiin, heng te avang te, mipui ten faina pawimawh zia kan hriat avanga hma kan lakna avangte a he lawmman hi dawng kan nih thu leh tute emaw dawn bik ni lovin kan vaia kan dawn a nih thu a sawi a. Amaherawh chu tunah hian lawmman pahnihna dawngtu kan nih angin hmabak kan la neih thu leh nakum-ah chuan lawmman pakhatna dawng thei tura \an lak a \ul thu a sawi a. Kumin atan ‘Mahni zel in aw’ tih chu thupui-ah kan hman tur thu sawiin, YMA leh VC te emaw pawhin Faina kawnga hma la turin hnatlang te pawh ko lo mah se keimahni zelin hma kan lak a \ul dawn thu a sawi a. Faina mai bakah khawpui chhung cheimawina lam nasa zawka uar a \ula a hriat thu pawh sawiin, sum sengso vak lo pawha a cheimawina lama \an lak a \ul thu a sawi bawk.

Nimin a he hun hman hi Serchhip District Urban Development Officer (DUDO), Vanthangpuii chuan kaihruaiin inlawmna thu a sawi bakah a kaihhruaina hnuaiah hian Faina thutiam lak a ni a, Grace Lalrinfeli, Manager, DAY-NULM chuan Mizoram khawpui Fai inelna neih zawh taka Serchhip khua in hma a lak dan leh Serchhip khua in point a hmuh dan te tarlangin, Khuallian leh DUDO hian he inelna-a Serchhip khua in lawmman pahnihna a lak avanga thuziak leh pawisa a dawn te chu an tlangzarh a. Serchhip khaw-chhunga High School te tan faina chungchangah Extempore Speech neih niin Zothankimi, Presbyterian English School, Serchhip chu pakhatna a ni a, R. Lalruatpuia, Presbyterian English School, Serchhip chu pahnihna leh Lallawmsangi, JM High School Serchhip chu pathumna an ni bawk.

Nimin a he hun hmanna ah hian VC aiawh leh YMA aiawhte pawhin thu an sawi a, intihsiakna neih a lawmman te semna hun hman nghal a ni bawk.