Latest News

Serchhip District-a East Lungdar-ah bialtu MLA in Helipad thar a hawng

Hrangturzo bialtu MLA leh Fisheries Minister, Vanlalawmpuii Chawngthu chuan nimin khan East Lungdar tlang-ah Helicopter \umna tur, Helipad thar a hawng.
East Lungdar tlang-a Helipad hawnna hunah hian Vanlalawmpuii Chawngthu chuan a bial chhungah Helicopter Service a awm ve dawn ta chu lawmawm a tih thu sawiin, Helicopter hi mipuiten hmang chur chur kher lo mah ila, damloh nikhua te, Official thil pawimawh ah leh rikrum thilah te a \angkai em em tih a sawi a. Helicopter chu mi hausa te chauh ban phak angin mi \henkhatten sawi mah se, sawrkar in subsidy sang tak a pek avangin a to lova, chuan hi a harsa lem lo tih a sawi bawk. Minister hian tunlai hmasawnna \hang chho zelah lirthei chauh nilo, thlawhna hialin kan rama khaw hrang hrangte a tlawhpawh chho zel chu a ropuiin a hlu hle tih sawiin, E. Lungdar a\anga damlo Helicopter a phurh thlak ngai awm apiangte chu hun engemawchen chhung chu an chuanman a tum sak tur thu a puang nghal a ni.
Nimin a East Lungdar-a Helipad thar hawnna inkhawm neih dawn hian Mizoram-a Service mek Pawan Hans Helicopter chu Helipad thar-ah hian rawn \umin Civil Aviation enkawltute Saidenga, Dy. Controller leh Lalrinfeli, LDC te, C. Lallunghnema, CE, PHE Department te leh bialtu MLA, Vanlalawmpuii Chawngthu unaute an rawn chuang a, Helipad thar hi Vanlalawmpuii Chawngthu hian hawngin Helicopter rawn \um hi a lo dawngsawng nghal a ni.
He hunah hian Saidenga, Dy. Controller, Civil Aviation pawhin thusawiin E. Lungdar khua chu a lawmpui thu leh vannei a tih thu a sawi a, E. Lung-dar mipuiten ropui taka an lo hmuak chu an lawm hle tih sawiin, Hapta tin Thawh\anni (Monday) apianga E. Lungdar-a Service tura ruahmanna siam a nih thu leh Ticket hi BDO Office a\anga lak tur a nih thu sawiin, a chuanman hi mi pakhat tan Rs. 2,500/- a nih thu a sawi a ni.
Helipad thar hawnna puala inkhawm hi H. Lal\ana, VCP in a kaihruai a, E. Lungdar mipui leh sawrkar hnathawk, zirlai naupangten Helipad hawnna hi an telpui a. Helipad hawnna ah hian E. Lungdar MUP member pali (4) leh khawtlang hruaitu mi 4, an vain mi 8 te chu E. Lungdar khaw chungah thlawh kualpui an ni bawk.

Comments

Popular News (Last 30 Days)