Sawrkar School-a hlankai lawmna CM in hmanpui

Chief Minister, Lal Thanhawla chuan nimin khan Kolasib a Govt. C. Zakhuma Higher Secondary School sawrkar School puitling a hlankai lawmna khuallian niin a hmanpui.
C. Zakhuma Higher Secondary School provincialized lawmna hunah hian Chief Minister chuan ram hmasawnna atan zirna pawimawhna leh zirlaite chu ram hmasawnna innghahna rohlu an nih thu sawiin, sawrkar pawhin kawng hrang hranga zirna tihmasawn tura hma a lak \hin thu a sawi a; graduate zat tam lam aiin mithiam chhawrtlak leh mi \angkai tam belh a pawimawh zawk thu a sawi a. Competitive exam chi hrang hrangah Mizo an thleng sang tawklo \hinin inziak tling an tamlo \hin chu hmasawn \ulna lai tak a nih thu a sawi bawk.
CZ Higher Secondary School hlankai lawmna inkhawmah hian biltu MLA, P.C. Zoram Sangliana chuan kalkhawmte lawmna thu sawiin, he School chu School \ha tak leh thalai mithiam leh hmantlak siamchhuaktu a lo nih zel a beisei thu a sawi a ni. School Principal, Lalnghilhlova Chinzah hnen a\angin report ngaihthlak a ni bawk.
Govt. C. Zakhuma Higher Secondary School hi kum 1999 khan khawtlang mipui \hahnemngaite hmalakna a din a ni a. A din tirh chuan Kolasib Morning College tih a ni a, a hnuah donor hming chawiin C. Zakhuma College tih a ni zui a. Hemi hnu hian Kolasib-ah Higher Secondary School mamawhna a tam avangin leh College \ha tak dang a awm tho avangin C. Zakhuma Higher Secondary School tiin thlak tak a ni. Kum 2008 khan Adhoc Grant-in-Aid a hlankai leh niin, kumin June ni 12-a Council of Minister \hukhawm chuan sawrkar School a hlangkai tura rawtna awm chu a pawm ta a ni. Tun dinhmunah zirlai 212 an awm mek a, Principal bakah Lecturer 12 leh Non-Teaching Staff mi 3 an awm a. MBSE examination hnuhnung berah khan pass percentage chu 84% a ni.

Latest News

Chief Minister hovin Council of Minister \hukhawm

Chief Minister, Lal Thanhawla hovin Council of Minister te chu niminpiah Chief Secretary’s Conference Room-ah \hukhawmin Department 9 a\an...

Popular News