Zirna In 5-ah Student Legal Literacy Club hawn a ni

Serchhip District chhunga Higher Secondary School ching chunglam zirna In panga (5)-ah te nimin khan Mizoram State Legal Services Authority (MSLSA) Member Secretary, Vanlalenmawia MJS chuan Student Legal Literacy Club a hawng.

Heng zirna In panga-a Student Legal Literacy Club hawnna inkhawm Serchhip District Court Conference Hall-a neih ah Mizo-ram State Legal Services Authority-a Member Secretary, Vanlalenmawia chuan kan ram mithiam, Graduate chin chunglam ah pawh Executive Magistrate leh Judicial Magistrate hre hranglo te, Advocate, Magistrate leh Ukil pawh hre hranglo VCP mai bakah Officer engemaw zat an awm thu sawiin, hetiang hi kan dinhmun a nih avangin zirlai ten an zirna an kalpui mek laia Dan lam hriatna an lo neih theihna tura hetiang Club din chu thil pawimawh tak a nih thu a sawi a. Student Legal Literacy Club hmang hian zirlaite chu sawrkar kalphung te hrilh hriat an nih dawn bakah an hnathawh dan te a taka entir an nih dawn thu a sawi bawk.

Nimin a Student Legal Literacy Club dinna te hi Govt. Serchhip College, Govt. Higher Secondary School Serchhip, Lal Thanhawla HSS Serchhip, Thenzawl HSS leh St. Peters HSS Chhngchhip te niin heng Student Legal Literacy Club te hnenah hian an mamawh atana hman turin Computer, Dawhkan leh hmanraw dang te sem nghal a ni bawk.

Student Legal Literacy Club hawnna hun hi Serchhip District Legal Services Authority-a Member Secretary, Lalngaihmawia Zote MJS chuan kaihruaiin inlawmna thu a sawi a, Sylvie Z. Ralte MJS, Kolasib District Legal Services Authority chuan Student Legal Literacy Club kalphung leh an hnathawh dan tur hrang hrangte sawiin, Student Legal Literacy Club hawn thar te aiawhin K. Lalrinchhana, Govt. Serchhip College chuan thu a sawi bawk.