Serchhip-a YMA hruaitu ten Vaihlo leh a kaihhnawih hrang hrang chungchang sawihona an nei

National Tobacco Control Programme, Serchhip District buatsaihin nimin khan tlawmngai pawl hruaitute tan Vaihlo leh a kaihhnawih hrang hrang khuahkhirhna chungchang sawihona neih a ni.
Tlawmngai pawl, YMA te tana 'Workshop on Tobacco Control 'hi Serchhip CMO Conference Hall-ah neih a ni a, he hun hi Tobacco Cessation Clinic-a Data Entry Operator (DEO), Lalramnghaka Kawlni chuan kaihruaiin tunhnaia Serchhip Sub-Hqrs. YMA hruaitute nen inkawmna an neih \uma an sawi angin hetiang hun hi buatsaih a nih thu leh Mizoram-ah YMA chu pawl lian leh zahawm a nih bakah a hmalakna chu mipuite pawhin an zawm \hat \hin avanga YMA hruaitute puala hetiang hun hi buatsaih a nih thu a sawi.
He hunah hian Dr. Lalhlunpuii, District Nodal Officer NTCP chuan Vaihhlo leh a kaihhnawih hrang hrang in a huam te tarlangin, heng Vaihlo leh Gutkha ten mihring taksa a natna hrang hrang an thlen dan a lem nen a entir a. Mizoram-ah mipui za zela 58 aia tam chu vaihlo leh a kaihhnawih engemaw ber ti an ni tih sawiin, tunhnaiah kum 14 leh 15 vel pumna an tam thu a sawi a, heng pumna te hi an kawmchian hnuah Gutkha Products engemaw ber ei \hin an nih thu leh Pumpui lawng nei ten Gutkha Products an tih \hin avangin awlsam taka Cancer an vei \hin thu a sawi a. Tunhma lamin Mizoram-ah Tiranga chu nasa taka a hluar thu leh MHIP ten a do hna an thawh hnuah bo duakin tunhnaiah hming hran, Sikhaar tih hming pu-a a rawn chhuah leh tak thu a sawi a, hetiang hian hming dang dang pu-a a rawn chhuah zel \hin thu a sawi bawk.
He hunah hian K. Hmingthansangi, District Consultant chuan Vaihlo leh kaihhnawih chi hrang hrang khuahkhirhna Dan te sawiin, Cigarettes and Other Tobacco Products Act (COTPA) in Vaihlo leh a kaihhnawih a khuahkhirhna kawnga hriat tur pawimawh hrang hrang a tarlang a. Maria VL. Neihlui, Psychologist chuan Vaihhlo leh a kaihhnawih ngawl vei theih dan leh a sim duh te tana Tobacco Cessation Clinic (TCC) hnathawh dan hrang hrangte a tarlang bawk. Nimin a he Workshop-ah hian Serchhip khawpui chhunga YMA Branch hrang hrang aiawhte bakah Sub-Hqrs. YMA aiawhte an tel a, sawihona hun hman zui a ni bawk.

Popular posts from this blog

PAN CARD an tih teh fo hi - Laldinpuia