Mizoram-a a hmasa ber turin Serchhip-ah Rualbanlote tan District Resource Centre hawn a ni

Zoram Entu Pawl (ZEP) leh National Institute for Empowerment of Person with Disability (NIEPMD) Chennai \angkawp buatsaihin nimin khan Serchhip District Bawrhsap, Sangchhin Chinzah chuan Serchhip P&E Veng-ah District Resource Centre a hawng a. Hemi rual hian rualban lohna hmuhchhuah hma a pawimawh zia zirhona neih a ni bawk.

Serchhip P&E Veng-a Zoram Entu Pawl (ZEP) leh National Institute for Empowerment of Person with Disability (NIEPMD) Chennai \angkawpin an buatsaih rualbanlote tana District Resource Centre hawnna hunah hian District Bawrhsap, Sangchhin Chinzah chuan Serchhip District chu kan vanneih thu sawiin, Mizoram District hrang hrang zinga District Resource Centre nei awmchhun kan ni chu vanneihthlak a tih thu a sawi a. Hemi hlawhtlinna atana thawktute inpekna leh thawhrimna chu lawmawm a tih thu a sawi a. Rualbanlo tia kan sawi \hin te chu nu leh pa leh khawtlang ten kan enkawl danin an \hanlenna ah kawngro a sut thu sawiin, hmangaihna nena kan enkawl a \ul thu a sawi a. District Resource Centre chu pianphunga harsatna nei leh rilru lama harsatna nei te pawhin taksa sawizawia Therapy an tih theihna tur a nih thu sawiin, hei hi ZEP hnuaia rualbanlo te mai ni lovin khawi hmun ami pawhin an hman \angkai theih a nih avangin inhrilh darh zel tur leh \angkai taka hmang turin a chah bawk.

District Resource Centre hawnna hun hi Margaret Vanlalnghaki, CBR Worker, ZEP chuan kaihruaiin District Bawrhsap hian rualbanlo te \angkai taka an hman turin Teaching Learning Material, MISED Kid chu a sem nghal a. He hunah hian ZEP Director, Fr. Lawrence Kennedy chuan inlawmna thu sawiin, District dangah hetiang nei thei an la awmloh laia Serchhip District in a nei thei leh Kohhran kaltlanga rualbanlote ham\hatna tura hna thawh a ni chu lawmawm a tih thu a sawi a. ZEP chuan kum 2006 a\angin rualbanlote ham\hatna tura hma an lak thu leh a tirah Aizawl District-a Tlangnuam leh Aibawk RD Block-a hmalakna bul \anin tunah chuan zau zawka hma an lak tawh thu a sawi a. Kum 2011 Chhiarpui-ah Mizoram-ah rualbanlo mi 15,160 chauh an awm anga chhinchhiah chu a dik tawkloh an rin thu sawiin, rualbanlo te hi chhinchhiah vek an nih loh chuan an tana ham\hatna awm thei te an dawn theih dawnloh avangin kim taka chhinchhiah an \ul thu pawh a sawi bawk.

Nimin a District Resource Centre hawnna neih a nih hnu hian ICDS hnuaia Angan-wadi Workers te leh ZEP CBR Project hnuaia Disable People Organisation te tan ‘Rualban-lohna hriat hma a \ul zia leh rualbanlohna ven dan’ tih thupui hmangin Training neih zui nghal a ni a, he hunah hian Liansangpuii, Protection Officer, DCPU leh Dr. Lalrinzama, Paediatrician, JN Hospital Serchhip te chuan kalkhawmte zirtirna pein mihring in rualbanlohna an neih te rang taka hmuhchhuah a pawimawhna te zirho a ni.