Vaihlo tellohna infiamna khawvel Mizoram-a siam tura hmalakna, 'Tobacco Free Sports Campaign' hawn a ni

Chief Minister, Lal Thanhawla chuan nimin khan Aizawl-a CM's Banquet Hall-ah 'World No Tobacco Month' hawngin, hemi rual hian Vaihlo tellohna infiamna khawvel Mizoram-a siam tura hmalakna, 'Tobacco Free Sports Campaign' chu a tlangzarh nghal bawk.

Mizoram State Olympic Association, Indian Society on Tobacco & Health, Mizoram Chapter leh Mizoram State Tobacco Control Society \angkawpin an buatsaih he Programme-ah hian Chief Minister, Lal Thanhawla chuan infiamna khawvelah Mizoram in hma a sawn zel a, International Level inelna thleng pha-a Medal la thei infiammi chhuanawm tak tak an awm chhoh a, chung hlawhtlinna ti\huanawp theitu pakhat chu hriselna ngaihpawimawh tawkloh leh nun uluk nachang hriat loh a nih thu avangin 'Tobacco Free Sports' nei tura hmalakna chu a pawimawh thu leh a hlawhtlin ngei a duh thu a sawi a. Chief Minister chuan Mizoram-ah Sports lamah chuan infiammite chu midang tan, naupang te te tan thlenga an entawn leh mi mit fukna an nih avangin an career atana an invawn a pawimawh piah lamah midang tan entawntlak an nih a pawimawh thu a sawi a. Chutiang bawk chuan anmahni enkawltute, officials leh administration lama awm te pawh player-te tana entawntlak an nih a pawimawh thu a sawi bawk.
World Health Organization (WHO) report a\anga alan dan in ruihhlo hrang hrang avanga thihna hrang hrang thleng aiin vaihhlo zuk leh hmuam avanga thi khawvelah an tam zawk thu tarlangin Chief Minister chuan, Mizo zingah zuk leh hmuam in hriselna a tihchhiat nasat theih zia hi inhrilhhriat belh kan la ngai hle a ni, a ti a. Chutihrual chuan \hahnemngaite hmalakna azarah hma kan sawn hret hret tih a lang a, a lawmawm hle a ni, a ti. Ziaktu pakhatin Mizote chungchang a sawinaa "Dam duh si, nun uluk peih silo" tia a ziah chu ngaihpawimawh deuh a nih thu pawh tarlangin Chief Minister, Lal Thanhawla chuan, damrei leh hrisel duh tan chuan ei leh in lamah pawh a tui tui ringawt ni lovin, a hrisel zawk ei leh in nachang hriat a ngai a ni, a ti a. He huna kalkhawmte chu an hma hun zel turah pawh Tobacco Free Sports hmalakna hlawhtlinna leh tihlawhtlingtu an nih chhunzawm a duhsak thu leh, vaihlo laka fihlim tura midang hrilhchhawngtu ni thei turin a chah bawk.
He hunah hian Indian Society on Tobacco & Health, Mizoram Chapter President, Lal Riliani chuan Vaihlo leh a kaihhnawih zuk leh hmuam chi te chu 'Gateway Substance', ruihhlo \halo tak tak tihna kawng hawngtu an nih thu a sawi a; ram changkang apiangin zuk leh hmuam an do nasa in, nunna leh hriselna a tihchhiat zia chu hre mah ila ngaihmawh leh zual kan ngai a ni, a ti a. Kumin World No Tobacco Day chuan vaihlo leh Lung natna inkungkaihna chu thupui-ah a neih tur thu tarlangin, Lung natna tan a \hatlohna leh, infiammi te tan phei chuan vaihlo zuk leh hmuam chu an hriselna leh career tan a hlauhawm zual zia te a sawi bawk.
Nimin a Programme hi \huang hnih a \hen niin Mizoram State Sports Council Secretary, C. Laltlanthanga chuan hun a kaihruai a. Dr. Jane Ralte, State Nodal Officer, National Tobacco Control Programme, Mizoram chuan 'Tobacco Free Sports' chungchang leh hmalak dan tur sawiin, Chawhnu lamah workshop neih chhunzawm a ni a. He hunah hian Mizoram-a Sports Association hrang hrang a\angin infiammite an tel a ni.
Global Adult Tobacco Survey (GATS) 2016-17 a lan danin India State hrang hrang vaihlo hman uar dan khaikhinna ah Mizoram chu 58.7% niin, pahnihna niin pakhatna chu Tripura a ni a. GATS Report 2010-ah khan Mizoram chu India rama vaihlo hman tamna ber a ni.

Latest News

Hmasawn zelna tur kan la nei

Hmasawn zelna tur kan la nei

Popular News