Mizoram Larsap atan Kummanam Rajasekharan ruat; PRISM in Larsap thar tur an duhlo

Mizoram Governor thar atan Kerala State-a BJP President ni lai, Kummanam Rajasekharan (66) chu ruat a ni a, Larsap tjhar ruatna hi Zirtawpni khan tihchhuah niin Vawiin, May 28, 2018-a term hmang zo tur, Lt. Gen. (Rtd) Nirbhay Sharma a rawn thlak ang.

Mizoram Governor atana ruat thar, Kummanam Rajasekharan hian CMS College, Kottayam a\anga B.Sc (Botany) a zawh hnuah Post-Graduate Diploma in Journalism a zo leh a, kum 1974-ah Deepika chanchinbu ah Sub-Editor niin, chanchinbu dang pathum vela a thawh kual leh hnuah kum 1976-ah Journalist hna chu bânsanin, Food Corporation of India-ah a thawk zui a. Vishwa Hindu Parishad (VHP)-ah telin, kum 1979-ah VHP-ah hian Kottayam District Secretary a ni a, kum 1981-ah VHP State Joint Secretary-ah kai lehin FCI-a a hna chu kum 1987-ah a bânsan a, Rashtriya Swayamsevak Sangh (RSS)-ah a inhmang chho zui ta a ni.

December 23, 1952-a piang, Kummanam Rajasekharan hi December 18, 2015 a\ang khan Kerala State BJP President a ni a, a kaihhruaina hnuaiah hian BJP chuan kum 2016 khan Kerala-ah hian MLA seat 1 (khat) an la a, bial 7-ah pahnihna an ni a. Amah pawh a dinna bialah 2-na a ni a, Vawiin May 28 hian Kerala Assembly bial pakhata by-election neih tur an hmachhawn mek laiin, kumina Assembly inthlanpui nei tur Mizoram Governor atan ruat a ni ta a ni.

Mizoram Larsap ni lai Lt. Gen. Nirbhay Sharma hi May 26, 2015 khan Mizoram Larsap 17-na a tan lakluh a ni a. Khatih hunlaia Gauhati High Court Judge, T.Vaiphei chuan Raj Bhavan Durbar Hall-ah rinawmna thu tiamtirin a lalut a ni.

Hetihlai hian Mizoram Governor atana ruat thar Kummanam Rajesekharan chu PRISM Party chuan an duh loh thu an sawi a. Inrinni-a thuchhuah an siamah PRISM chuan 'Governor thar tur hi RSS mi leh sa, VHP leh Hindu Aikya Vedi-ah pawh a sulsutu zinga \angpha a nih avangin kan rama awmah inhmeh kan ti lo va. Hei bakah hian politic a inhmang lai anih avangin leh Election kan hmachhawn mai dawn avangin tha kan ti lo a ni,' an ti. Sawrkar lai Congress Party pawh Larsap thar chungchangah hian an lawmlo nia thudawn a ni a, BJP chu Karnataka inthlan neih zawha a chet dan anga chet leh tumah a puh a ni. Governor thar hi engtikah nge lakluh a nih dawn hriat a ni lova, kum 2014 July thlaa UPA sawrkar NDA in a thlak hnuah Mizoram chuan Governor a nei zut a, kum 4 kalta chhung khan Governor 8 a nei hman a ni.