Nimin March 15 khan khawvel pumah 'World Consumer Rights Day' hman a ni a, Serchhip-ah pawh Serchhip District Consumer Association buatsaihin Govt Serchhip College-ah World Consumer Rights Day hi hman niin kumin hian 'Making Digital Marketplaces Fairer' tih chu thupui-ah hman a ni. Serchhip-a 'World Consumer Rights Day' puala inkhawm hi Serchhip District Consumer Association President, H. Zonuntluanga chuan kaihruaiin Consumer hmalakna hrang hrang te, Consumer Rights lo chhuah dan te leh Serchhip District Consumer Association tena mipui rawngbawlna kawnga an lo hmalak tawhna te a tarlang a. He huna a tarlan dan chuan Consumer Association te hian thil lei leh hralh chungchangah te leh Consumer affairs kaihhnawih hrang hranga mipui ten an harsatna an thlen te chu theih ang angin an chinfel sak \hin a. Dik taka thillei leh hralh anih theih nan Bukna te endikin thil diklo taka titute chu dan hmanga hrem an ni \hin a. Consumers ten an chanvo an chan theihna kawng hrang hrangah inrem taka thil kal theih a nih laiin Consumer Court thlenga kal ngaih chang te pawh a awm thu sawiin, heng ah te hian Consumer te \anpui tura an awm reng thu a sawi bawk. He huna thusawitu dang Serchhip District Consumer Association-a Secretary, Laldinpuia chuan kumina Consumer Rights thupui 'Making Digital Marketplaces fairer' tih hmanga thu sawiin, tunlai khawvel-a Digital Market pawimawhna leh hman \angkai a \ulna te sawiin, tunlai khawvelah chuan thil engkim deuhthaw hi Computer leh Internet kaltlang anih tawh avangin fimkhur a \ul thu a sawi a. Online Marketing System te Digital transfer payment kan siam kawngah te kan fimkhur a \ul hle tih sawiin, heng te hi a kalhmang leh tihdan te thiam a harloh thu sawiin, zirlai rual te chu thiam vek turin a fuih a. Digital system hnuaiah hian \halaite tan sum tuakna tur thawh tur pawh mahni tawkah tam tak a awm a, a rilru nei leh peih tan chuan hengte hi sum lakluhna tha tak a ni mek tih thu a sawi bawk. Nimin a he hun hmanna ah hian Serchhip District Consumers Association hruaitute bakah zirlai \hahnem tak an tel a, Mizoram hmun hrang hrangah pawh 'World Consumer Rights Day' hi hman a ni bawk.

Chief Minister, Lal Thanhawla chuan ramri chungchanga Mizoram Chief Secretary leh Assam Chief Secretary inbiakna huna tel tur Mizoram aiawh te chu nimin khan a Office-a Cabinet Room-ah kokhawmin thu pawimawh chhawpchhuah turte enfiahpui.

He hunah hian Chief Minister chuan Mizoram Sawrkar aiawhte chu an hnathawh a pawimawh tih chiang tur leh rilru fim tak pu chunga Mizoram sawrkar tan theihtawp chhuah turin a fuih a. He hunah hian sawrkar mi pawimawh – Land Revenue & Settlement leh Home Department te bakah Mizoram State Boundary Commission member te an tel a. State pahnih Chief Secretary te inbiakna a pharh tur Mizo-ram Sawrkar lehkha pawimawh leh Mizoram sawrkar \anchhan zawng zawngte chu a mal te te in uluk taka zirchian nawn leh vek a ni.

Tarlan tawh angin March 20 khian Ministry of Home Affairs, New Delhi-ah Union Home Secretary kaihhruaina hnuaiah Mizoram Chief Secretary, Arvind Ray leh a team te chuan Assam Chief Secretary leh a team te nen ramri chungchangah state pahnih te aiawhin inkawmna an nei dawn a, he hunah hian Chief Secretary hi Home Addl Secretary, Lalbiakzama leh Home OSD, David H. Lalthangliana ten an zui dawn a ni. Nimin a \hutkhawm ah hian Political Adviser to Chief Minister, Lalrinmawia Ralte bakah Chief Minister Office-a Principal Secretary Lalram Thanga leh Principal Adviser RL. Rinawma te pawh an tel a ni.