Chamber of Commerce Serchhip Assembly neih a ni

Serchhip-a sumdawng inzawmkhawm, Chamber of Commerce Serchhip chuan nimin khan Assembly neiin an pawl hruaitu tur thlanna an nei.

Chamber of Commerce ten PC. Sarala (L) In, Serchhip Bazar-a Assembly an neih hi an pawl Vice President, V. Zaliankhuma chuan kaihruaiin kum 2016-2018 chhunga an member boral mi 12 leh an chhungte boral mi 6 te sunna hun hmangin Secretary leh Fin. Secretary te hnen aṭangin report ngaihthlak a ni bawk. Chember of Commerce Assembly hian an pawl inkaihhruaina dan hman mek chu ennawnin siamṭhat ngai hrang hrangte an siamṭha a. Hemi hnu hian MJA Serchhip District te kaihhruaina hnuaiah an pawl hruaitu tur thlanna neih nghal a ni a, President-ah V. Zaliankhuma, Hmar Veng; Vice President-ah Ralzatawna, Bazar Veng; Secretary-ah F. Lalthlamuana, Bazar Veng; Asst. Secretary-ah PC. Zosangliana, Bazar Veng, Treasurer-ah B. Rokima, Tuikhuah Veng leh Fin. Secretary-ah K. Tlang-thanmawia, Bazar Veng te thlan an ni.