Serchhip Chanmari Veng-ah chenna In pakhat kangral

Nimin Oct. 29, 2017 tuk\huan eikham, dar 8:30 vel khan Serchhip Chanmari Veng-ah chenna In pakhat chu bungrua engmah chuh hman lohin a kangral.

He In kang hi Chanmari Veng a\anga Hriangtlang panna kawng-a In tawp ber, Lal-chawimawina te In, Assam Type niin chhungkaw pahnih luahlai a ni a, In neitu Lalchawimawia (JN Hospital Serchhip-a IV-Grade a thawk) te hian kawng an chu luahin a hnuai hi a U, Vanramthangi chuan a luah thung a. Vanramthangi hi a zin lai niin Lalchawimawia hi a fate pahnih nen chengin kangmei chhuah lai hian In neitupa hi a awm lova, a fate pawh an \henawm hnai ah an awm a, hei vang hian kangmei chhuah chhan hi hriat a ni lo.

In kang hi Veng hmawr-a awm a nih avang leh \henawm hnai an neihloh avangin hriat a ni mai lo a, an In awmna ep-a cheng ten hmu hmasain Fire Department hriattir nghal an ni a, anni hian rang takin helai hmun hi thleng mah se kangmei hi alo nasa tawh avangin bungrua chuh hman a ni lo thung a ni. Nimin vek khan \henawm khawveng ten In kang bang senghawi hna hi an thawk nghal a, bungraw kangchhe zingah hian TV (2), Fridge, Washing Machine, Steel Almirah leh bungraw dang \hahnem tak a tel a ni.

Kangmei chhuahna hmun hi nimin vek khan Serchhip DC Office a\angin SDC, Beitlotha Nohro, MCS chuan tlawh nghalin Silpouline 3 a hlan bakah hnatlangte thingpui lumna atan Rs. 2000/- chu Chanmari Branch YMA kutah a hlan nghal a, sorkar a\anga \anpuina awm thei ang te ngaihtuah sak an nih tur thu a sawi bawk. Salvation Army Serchhip Corps Emergency and Relief Team te pawhin nimin vek khan \anpuina atan Rs. 3000/- chu Chanmari Branch YMA te kutah an hlan nghal bawk a ni.

Kangmei tuar te tan hian Chanmari Branch YMA chuan Vehbur khawn nghalin VC leh YMA ten In sakna tur hmanrua lakhawmin In hi sak sak leh tura ruahman a ni bawk.