MNF in CBI kohluh dilna sut nia sawiin, Chief Minister-ah ngenna an thlen leh

MNF Party chuan Mizoram-a Congress sorkar in CBI kohluh dilna a sut nia sawiin, nimin khan Chief Minister chu a Office-ah hmuin Lottery sum chingpen chungchang leh Zo-Carbon-a sum diklo taka eirukna chungchangah lehkha an thehlut nawn leh.

Nimin a MNF party thuchhuah siamin a tarlan danin MNF General Secretary leh Secretary rual leh MNF |halai hruaitu mi engemaw zat te chuan nimin khan Chief Minister, Lal Thanhawla chu a Office-ah hmuin Lottery sum chingpen chungchang leh Zo-Carbon-a sum diklo taka eirukna chungchang ah lehkha an thehlut nawn leh a. Zo-Carbon chhui tura CBI kolut tura ngenna, Chief Minister ngeiin tifel tawh anga kumin June 9-a a insawi chu thlakhat lek a ral hman tih ah CBI kolut tura ngenna hi a sut lehna lehkha July 31 khan a siam hnan leh tih an tarlang a, hei hi \halo an tih thu sawiin, Sut leh a nih chhan leh vang 'In the interest of public service' tih ringawta lehkhaa inziak sawichiang deuh tura MNF hruaituten an tih chu chhangin Chief Minister chuan, 'High Court-ah Ruatfela Nu-in PIL case a thehluh thubuai kallai a nih avangin CBI kohluh hi a rem lo' tiin a lo chhang tih an tarlang a; High Court-a PIL pawh CBI kuta dah tura ngenna tho a nih avangin a remlohna an hre lo an tih pawhin ti tur ang zawngin chhanna an dawng lo tih an sawi bawk.

Lottery sum chingpen chungchanga Chief Minister-in Sept. 1, 2017-a MNF lehkha a chhanna ah Lottery Distributor-te inkhinna a awm rih avangin CBI chhuitir a rem rih lo anga ziak chu MNF chuan a remlohna a awm an hriat loh thu sawiin, hriatthiam har an tih thu leh a ruka hel tumna awm nia an hriat thu an sawi a, hei hi Chief Minister chuan, 'Kan lawyer-te min hrilh dan a ni a, a tih dan in hria a nih chuan lehkha rawn siam ula, hming ka lo sign ang. Ukil dangte pawhin lehkha lo siamin Lottery chungchang hi Home Minister Rajnath Singh-a hnenah pawh lehkha an lo thehlut a, vawiin ni thlengin engmah an la rawn ti lo. Home Minister-ah a tawp tawp mai a ni,' a ti tih an sawi bawk.

MNF chuan corruption phoro tur chuan State sorkar awpna hnuaia awm ni lo, CBI ngeiin chhui se, thudik a langchhuak ngei tura an ngaih thu leh chhuanlam dawrawm tak tak siama Lottery leh Zo-Carbon chungchanga thil diklo lian tak tak inphumte hi haichhuah a nih theih nan amah Chief Minister-in CBI kuta dah tura a insawi anga hma a la lo a nih chuan amah ngei pawh tel vea an ngaih tur thu leh, heng case 2-te hi CBI kuta a hlan lo a nih chuan Court hmangin emaw, kawng dang a\ang pawhin CBI kuta dah tura hmalak chhunzawm zel an tum tur thu Chief Minister hnenah hian ziakin an thlen a ni.