Zirlaite avanga buaina thleng ah H&TE Minister chu mawhphurtu berah Dr. BD. Chakma-a’n a puh

Minister of State (MoS) anihna a\anga bang ta, Dr. BD. Chakma chuan Higher & Technical Minister, R.Romawia chu Technical Zirlai Counseling pek tur zinga Chakma Zirlai te an tel ve avanga buaina chhuakah a mawhphurtu bera a ngaih thu a sawi.

Dr. BD. Chakma chuan AIR Palai zawhna chhangin, Higher & Technical Education Minister-in July ni 26-a thuchhuah a siamah ram leilung fa dik tak ten Mizoram Quota an luah ngei theih nana The Mizoram (Selection for Higher Technical Courses) Rules 1999 chu siam\hat niin kum 2015 khan a siam\ha a. He Dan siamthar hi tu emaw in a khin avangin High Court in Dan thar hman a phal loh chu, Dan hlui pawh nise kuminah chuan Mizoram chuan Category-I chu ram neitu Zofate kutah chauh a dah dawn tih R. Romawia'n a sawi chu thil pawm theih loh, Dan kalh a ni, a ti.

Dr. BD. Chakma chuan nimin-a Mizo Zirlai te Counselling neih tur pawh hriattirna awm lovin nizan hmasa ah Radio hmanga puan a nih thu a sawi a, Aizawl pawna awm tan chuan thlen theih a ni lo nia sawiin, Chakma zirlai Counselling kal tur te pawhin nimin nileng khan koh an nghak tih a sawi a, Aizawl SP-ah venhimna an dil pawh hnial thlak an ni a, zirlai te pawh koh an ni lo, a ti a, an thil kalpui dan chu a \halo hle tih a sawi bawk.

Dr. BD. Chakma chuan Mizoram chhunga Chakma Foreigner lo luh chungchangah SDO, BDO te leh Official te bakah Election Commission te pawh Mizo vek an ni tih sawiin, BLO bak Chakma Official pakhatmah an awm lo tih a sawi a, “Electoral Roll leh Hearing neih-ah anmahni ngei kala Document ngai te nena endik vek an ni ngei awm si a, engtin nge Dan lovin Electoral Roll-ah an chuan theih ang?” tiin zawhna a siam a. Hei bakah hian hnam bil tana hmala \hina puhna chungchanga zawhna chhangin Dr. BD. Chakma chuan Democracy hnuaiah mi tu pawhin a ngaihmawh thil chu a ti thei a, pawi a sawi leh sawi loh erawh a thlirtute ngaihdan a ni tih a sawi a, NGO hrang hrang, Young Chakma Association thlengin mahni hnam thil leh hmasawnna tur chu an auchhuahpui \hin a nih thu a sawi bawk.

Tuichawng bialtu MLA ni bawk Dr. BD. Chakma chuan Mizote leh Chakma te inkarah inhriatthiamna awm thei se a duh thu a sawi a, innghirhona dah bova \ha taka inbiakna awm thei se a duh thu a sawi bakah a banna chungchangah ama duh thu ngeia bang a nih thu a sawi a, Congress hotuten bang tura an nawr loh thu sawiin, hetiang dinhmun an thlen takah chuan ban a duh leh duh loh thutlukna siam turin an hrilh mai zawk niin a sawi bawk.